Bandièra01 capçalera  1180x150: Novestivada

Actualitats

Grècia abandona en mar los refugiats sirians dins de tendas flotantas

Moment que los guardacòstas turcs socorreguèron la femna siriana abandonada en nauta mar que parlèt amb los confraires d’<em>Ara</em>
Moment que los guardacòstas turcs socorreguèron la femna siriana abandonada en nauta mar que parlèt amb los confraires d’Ara | Gàrdia costièra turca

Al quatren assag de calcar lo sòl de l’Union Europèa dins l’illa de Ròdes, per mar, los gardacòstas los remandèron pas en Turquia mas los embarrèron quatre jorns dins un camp de refugiats. Puèi, d’òmes encagolats los menèron dins un vaissèl e quand èran en nauta mar los abandonèron en plena nuèch dins de batèls de salvament sens cap de mejan de cridar socors, çò explica una femna siriana als jornalistas d’Ara.


Grècia abandona los refugiats sirians sus la mar dins de tendas flotantas, çò assegura un reportatge publicat pel jornal catalan Ara, qu’a parlat amb una siriana de 50 ans. Ela e sos enfants d’11 e 13 ans fugiguèron Siria per paur dels bombardaments en cercant d’arribar en Euròpa. Al quatren assag de calcar lo sòl de l’Union Europèa dins l’illa de Ròdes, la siriana entrevistada explica qu’aquel còp los guardacòstas los remandèron pas en Turquia mas los embarrèron quatre jorns dins un camp de refugiats. Puèi, d’òmes encagolats los menèron dins un vaissèl e quand èran en nauta mar los abandonèron dins de batèls de salvament en forma de tendas flotantas.
 
Segon Ara, lo cas d’aquela siriana es pas unic. Cada còp son mai nombrosas las pròvas que Grècia a passat l’òsca pertocant la violéncia contra los migrants que li arriban dempuèi qualques annadas. S’agís pas solament de gases lacrimògens e de barbelats a las frontièras terrèstras, ni d’aver tresmudat las illas en una mena de purgatori ont de milièrs d’enfants, femnas e òmes passan d’ans amolonats quitament en plena pandemia, sens possibilitat de respectar las mesuras d’igiène; ara abandonan lo mond en nauta mar en plena nuèch dins de batèls conflables qu’an pas de motor ni cap de biais de se propulsar, ni mai de mejans per cridar socors. A mai, lor confiscan los telefòns mobils, d’espleches essencials a la subrevivéncia dins la fugida.
 
“Las autoritats grègas o refusan mas cada còp s’empilan mai de pròvas que los gardacòstas abandonan sistematicament en mar de migrants dins aqueles batèls de salvament”, çò explica un cercaire del collectiu grèc Disinfaux, qu’a estudiat de desenas de cases coma aquel. Un d’aqueles cases lo publiquèt lo jornal grèc Efsyn, que se mòstra lo numèro de sèria d’un d’aqueles batèls, fabricat en Grècia. Tanben an raportat aquela sòrta de practicas de mèdias coma Der Spiegel o Bell¿ngcat e las a documentadas Legal Centre Lesvos.
 
Segon los cercaires, aquelas practicas comencèron en març passat, quand lo govèrn de Recep Tayyip Erdoğan anoncièt la dobertura de las frontièras per daissar passar los refugiats devèrs Euròpa. Grècia i reagiguèt amb un fòrt desplegament militar e policièr a la frontièra terrèstra del flume Èvros (o Maritsa), que los responsables de la Comission Europèa li diguèron “lo bloquièr d’Euròpa”, e tanben en suspendent lo drech de demandar l’asil al país, çò que contraven al drech internacional.

 
 
 
 

 
 
 
abonar los amics de Jornalet
 
 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Euròpa
2.

Temps un : abausam tota la societat grèca (a despart dels mai rics) en los aclapant d'un deute que non an jamai contractat los ciutadans.

Temps dos : l'infèrn s'espandís de l'autra man de la mar.

Temps tres : de refugiats aganits e adalits que fugisson aqueste infèrn se sarran de las còstas europèas (passant per pasiblas e ricas) en esperant i ganhar la subrevida.

Temps quatre : imaginavetz seriosament los Grècs aclapats pel deute que non an jamai contractat dispausats a partejar lor misèria totalament injusta amb d'autres desesperats encara mai apaurissits qu'eles, del temps que los i gaitèram far sense bolegar lo det menel, sonque ?

  • 11
  • 0

Escriu un comentari sus aqueste article