Lo president de la Generalitat de Catalonha en exili, Carles Puigdemont, e sos ministres en exili Clara Ponsatí e Toni Comín, an participat aqueste dijòus passat a la manifestacion que se ten cada dijòus en Catalonha Nòrd per protestar contra la situacion dels independentistas catalans exiliats o encarcerats. L’eveniment se teniá de costuma a Perpinhan, davant lo Castelhet, mas aquesta setmana se faguèt davant la Maternitat d’Elna, un endrech mai que simbolic pels refugiats de la guèrra d’Espanha a partir de 1939. Desenant, la manifestacion se tendrà cada setmana fòra de Perpinhan.
 
Puigdemont, Comín e Ponsatí foguèron acompanhats per qualques personalitats, coma lo cònsol màger d’Elna, lo vicepresident del parlament de Catalonha, e lo director de l’Ostal de la Generalitat a Perpinhan.


 

 

“Afrontament intelligent” amb l’estat que vòl pas negociar

L’endeman, Puigdemont prononcièt una conferéncia a Prada de Conflent ont remarquèt l’enòrma repression que l'a exercida l’estat espanhòl sens èsser capable de desactivar l’independentisme. Dins aquel sens, assegurèt que lo “vejaire realista” èra l’uniteralitat e un “afrontament intelligent” amb l’estat, qu’a demostrat que vòl pas negociar.