La Val d’Aran aculhís aqueste estiu fòrça mai vesitaires que d’abitud fins al ponch que lo Conselh General d’Aran a degut contrarotlar los accèsses e lo nombre de vesitaires dels espacis naturals mai frequentats. Las zònas limits son los paratges de l’Artiga de Lin, la Bassa d’Oles, Varradòs, Aiguamòg e lo vilatge de Bausen. Dins aqueles endreches, quand los pargatges son plens, d’agents del Conselh General plaçan de barralhas per empachar l’accès en veitura.
 
Aquelas mesuras an favorit lo sector dels taxis. Per exemple, al barratge d’Aiguamòg trabalhan sèt veïculs de 9h a 15h sens relambi.
 
A mai, dins la val de Varradòs e los Banhs de Tredòs lo govèrn aranés es a trabalhar sus un projècte de comptabilizacion electronica de veïculs amb de senhals qu’indiquen la disponibilitat dels pargatges. Aqueste sistèma l’establís la societat aranesa d’engenhariá Arantec, coneguda per son projècte pionièr de contraròtle de las crescudas de Garona per evitar los aigats.
 
 

Eth govèrn d'Aran establís contròles d'accès a compdar d'aué enquiath 22 d'agost pr'amor des aglomeracions enes ribères dera @Val_dAran: Bassa d'Oles, #Artiga de Lin, #Varradòs, #Aiguamòg e #Bausen a fin de garantir era #seguretat des visitants.
+: https://t.co/GzAgo2J1ICpic.twitter.com/chcWJK2glN

— Conselh Generau Aran (@conselharan) August 20, 2020