Bandièra01 1180x150: Comuna de Tolosa

Actualitats

InternacionalPoliticaSocietat

De protèstas après un autre cas de violéncia policièra racista als Estats Units

De policièrs seguisson un òme mentre qu’intra dins sa veitura, e lo fusilhan sèt còps dins l’esquina, a boca tocanta, davant sos tres enfants que son dedins

Manifestacion a Kenosha (Wisconsin)
Manifestacion a Kenosha (Wisconsin) | @Ashlee_Rezin
Un autre cas de violéncia policièra racista als Estats Units a amodat las protèstas del movement #BlackLivesMatter. De policièrs an fusilhat dins l’esquina Jacob Blake, un òme de 29 qu'es ara espitalizat dins un estat grèu. Aquò s’es passat a Kenosha (Wisconsin); lo vidèo, qu’a virat dins los rets socials, mòstra cossí los policièrs perseguisson Blake que, sens brandar cap d’arma, ensaja d’intrar dins sa veitura ont son sos tres enfants. Mentre qu'es a mand de dobrir la pòrta e d’intrar, un dels agents l'arrapa per la camiseta del temps qu’el e d’autres agents lo fusilhan dins l’esquina fins a sèt còps. Blake tombèt, nafrat fòrça grèvament, e un avion lo menèt a l’espital Froedtert de Milwaukee.
 
Segon la version de la polícia, los agents s’ocupavan d’un “incident domestic”.
 
La difusion del vidèo de la scèna suls rets socials e dins los mèdias estatsunidencs a provocat de manifestacions e a relançat lo debat sul racisme e las violéncias policièras. De centenats de personas manifestèron dins la vila de Kenosha per tornar revendicar las exigéncias del movement Black Lives Matter (las vidas dels negres son importantas), qu’es vengut de mai en mai nombrós, sustot après l’assassinat de George Floyd estofat per un policièr.
 
Lo governador de l’estat de Wisconsin, Tony Evers,confirma que “Jacob Blake a recebut divèrses còps de fuòc dins l’esquina, en plen jorn”. A mai, exprimís sa solidaritat amb los que protèstan: “Sèm del costat de totes los que contunhan d’exigir justícia, equitat e responsabilitat per las vidas negras dins nòstre país, de vidas coma las de George Floyd, Breonna Taylor, Tony Robinson, Dontre Hamilton, Ernest Lacy e Sylville Smith”.
 
 
 
 
 


abonar los amics de Jornalet

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article