Bandièra01 1180x150: Comuna de Tolosa

Actualitats

InternacionalPolitica

Creisson las tensions entre Grècia e Turquia

Turquia fa d’exploracions de gas natural davant l’illa grèga de Castellorizo. Grècia i a reagit amb de manòbras militaras dins la zòna e Turquia i a respondut tanben amb de manòbras militaras a unes cent quilomètres de Creta

| Ministèri de l\'energia de Turquia / Reuters
Puèja totjorn que mai la crisi entre Grècia e Turquia. Los dos païses tenon una disputa maritima que pòt venir un conflicte militar. E ara las tensions son anadas mai luènh après que Turquia faguèt d’exploracions de gas natural davant l’illa grèga de Castellorizo, e que Grècia i respondèt amb de manòbras militaras dins la zòna abans que Turquia i reagiguèsse tanben amb de manòbras de militaras a unes cent quilomètres de Creta.
 
Turquia argumenta que son a perforar una partida del platèu continental. Per contra, Grècia ditz que las illas las cal prene en compte a l’ora de delimitar lo platèu continental segon la Lei de la Mar de las Nacions Unidas, que li concedís l’exclusivitat de la zòna mas qu’es pas estada ratificada per Turquia.
 
Lo president de Turquia, Recep Tayyip Erdoğan, a acusat lo govèrn grèc de “provocar lo caos” en Mediterranèa orientala. “Los que mandan Grècia davant l’armada turca la sostendràn pas après, a l’ora de la vertat”, çò assegurèt pendent una conferéncia de premsa.
 
Dimars passat, lo ministre dels afars estrangièrs alemand, Heiko Maas, sollicitèt dels dos estats que tornèsson prene lo dialòg sus las revendicacions territorialas. Ara començarà un viatge de mediacion dins los estats.


 
 
L'illa grèga e la còsta de Turquia amb la frontièra definida per la convencion italoturca de 1932




 

 
 
 



abonar los amics de Jornalet

 


 
 
 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

La vièlha volia pas morir
4.

#3 Quand se pensa que fa un quinzenat d'annadas se declarar contra l'entrada de Turquia dins Europa, que Brussèlas ensajava de nos faire engolir, vos fasia passar còp-sèc per un òrre retrograd racista !

  • 2
  • 0
Fanc Bardòu
3.

Turquia respècta pas plen de causas : notadament las femnas ni los Kurds ni los Armenians…

  • 6
  • 0
Marin, Mistral, Tramontana e Gregal...
2.

Trivial Pursuit occitan : Qual cantaire occitan es originari de Castellorizo tras una de sas mamètas ? Lo
nòstre...Patric ! Aquel faguèt un disc en omenatge a sa grand que daissèt son iscla grèga de Castellorizo per las ribas lengadocianas de l'estanh de Tau. Fai sègles que nos pòrta causas aquel vent gregal !

  • 6
  • 0
Mens
1.

En França, cal préner en còmpte las isclas coma Corsega per delimitar las zònas, non? Amb Itàlia.

Alora es pas complicat. "Grècia ditz que las illas las cal prene en compte a l’ora de delimitar lo platèu continental segon la Lei de la Mar de las Nacions Unidas, que li concedís l’exclusivitat de la zòna"

Es pas lor problèma s'es pas estada ratificada per Turquia. Turquia respècta pas plen de causas e cal pas se laissar far.

Ne'n aurem jamai finit amb lo neo otomanisme otomaniac.

  • 11
  • 0

Escriu un comentari sus aqueste article