Bandièra01 1180x150: Comuna de Tolosa

Actualitats

Escàndol pel retrach coma esclava de la deputada francesa Danièle Obono

La politiciana francogabonesa de la pèl negra e coneguda per sos prepauses antiracistas, la revista Valeurs Actuelles l’a representada coma una esclava. La condemnacion politica es estada unanima

Refús unanim de la classa politica francesa a respècte de la representacion racista que la revista Valeurs Actuelles a fach de la deputada francesa Danièle Obono (LFI). Una larga franja de la classa politica de l’estat francés a condemnat aquel “retrach” de la revista ultradrechista. “Una deputada negra que pòrta las cadenas de l’esclavatge al còl!”, çò descriu la Fondacion Frantz Fanon qu’a cridat a manifestar dissabte que ven davant los locals de Valeurs Actuelles, a París, “en sosten a Danièle Obono e per luchar contra la banalizacion del discors racista e sos promotors mediatics”.
 
Segon la fondacion Fanon, lo recit fictiu de Valeurs Actuelles “se voluda dins lo revisionisme e lo negacionisme istoric, car exonèra los europèus de tota responsabilitat dins la tracha transatlantica negrièra”.
 
La quita Danièle Obono a qualificat aquela publicacion “de mèrda racista” e l’òbra de “l’extrèma drecha, odiosa, bèstia e crusèla”. De son latz, lo primièr ministre, Jean Castex, a assegurat qu’aquela “publicacion revoltanta apèla una condemnacion sens ambigüitat”. Castex a partejat l’indignacion d’Obono e a assegurat lo sosten de l’ensemble de son govèrn.” La lucha contra lo racisme transcendirà, totjorn, totas nòstras divisions”.
 
De son caire, lo ministre de la justícia, Eric Dupond-Moretti, a avertit qu’òm “es liure d’escriure un roman nauseabond, dins los limits fixats per la lei. Òm es liure tanben d’o aborrir”. E a assegurat qu’el tanben aborrissiá la publicacion racista.
 
Mentretant, lo magazine conservator Le Point a donat la paraula a Tugdual Denis, director adjonch de Valeurs Actuelles qu’a ensajat de justificar la publicacion malastrosa en disent que volián “metre lo det sul fach que l’esclavatge es pas imputable als sols europèus, mas que los africans e los arabis an tanben utilizat la tracha”. En mai d’aquò, a criticat durament las presas de posicion anticolonialistas de la deputada qu’an umiliada. Solament cal veire los gròsses títols que Valeurs Actuelles a consagrats a la deputada Obono per remarcar qu’aquesta ten de posicions que destorban la redaccion.

 
 
 
 
 
 



abonar los amics de Jornalet

 


 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
4.

E de grafinhaires de Valeurs Actuelles sont invitats a tira qui pòt suls mèdias televisius per nos explicar çò que cal pensar per nos fargar una pensada condrecha. Con-ultra-drecha òc !

  • 7
  • 0
Franc Bardòu
3.

"Valeurs actuelles" ? Coma se foguèssen aquestes arlèris que nos anavan enonciar çò qu'actualament a de valor o non !!!… Quines pretencioses !

  • 19
  • 4
Mirelha F. París
2.

D'un caire aquò es una ataca personala contra una deputada que Valeurs Actuelles supòrta pas brica, coma o demòstra dins totas sas publicacions. De l'autre, es un ensag de culpabilizar la societat musulmana del nòrd d'Africa de l'esclavatgisme, lo crime pus òrre de l'istòria de l'umanitat qu'Euròpa n'es responsabla. Tot mon sosten a la deputada Obono e a la fondacion Frantz Fanon

  • 18
  • 7
Maignial Galhac
1.

Aquò's pas solamensa un "roman", aquò's racisme amai una ataca personala contra una persona fisica e una deputada. Es un delicte e vesi pas perqué i auria pas de contra ataca en justicia.

  • 17
  • 0

Escriu un comentari sus aqueste article