La rintrada d’ongan es totalament excepcionala. Lors corses reprenon uèi dins la majoritat d’Occitània après la crisi del coronavirus. Los ensenhaires e mai los escolans de tot lo país son inquiets davant las incertituds d’aquesta rintrada. Dins aqueste article volèm raportar çò qu’almens sabèm a prepaus de la rintrada dins cada territòri administratiu d’Occitània. A mai, volèm encoratjar los ensenhaires de nos mandar lors experiéncias a info(a)jornalet.com.

Rintrada en Aran
 
La rintrada escolara en Val d’Aran es prevista pel 14 de setembre e la Generalitat de Catalonha a fòrça investit per embauchar de nòus ensenhaires e de personal. Se crearà de “grops estables de convivéncia” que se poiràn trobar ensems dins d’airals comuns. Los que faràn partida de grops desparièrs respectaràn de separacions. Cada còp que se detectarà un infectat, s’isolarà tot lo grop estable de convivéncia e se testarà massissament l’eventuala preséncia del coronavirus.
 
Lo pòrt de la masca es obligatòri a partir de 6 ans.
 
 
Rintrada dins las Valadas
 
Las classas començaràn lo 15 de setembre. Los escolans seràn plaçats a de taulas individualas. Coma i aurà pas pro d’espaci dins las escòlas per respectar la distància de seguretat, s’adapta d’autras bastissas per aculhir d’escolans. Lo personal passarà d’espròvas PCR. Quand se detectarà un cas positiu, lo centre serà desinfectat cada jorn.
 
L’estat italian prevei lo barrament temporari d’un centre escolar e mai s’es afanat per l’atencion psicologica per ajudar dins las situacions d’estransi, de paur o d’esmai fàcia a la covid-19.
 
A prepaus del pòrt de la masca l’estat italian es encara a prene de decisions.
 
 
Rintrada dins la rèsta d’Occitània
 
En Occitània Granda an un pauc assoplit las mesuras de seguretat: la distància d’un mètre dins las classas, las bibliotècas o los refectòris quitarà d’èsser obligatòria quand serà pas possibla o qu’aquò permetriá pas d’aculhir totes los escolans.
 
Lo pòrt de la masca es obligatòri a partir d’11 ans e per totes los professors, quinas que sián las distàncias dins la sala de classa.