Bandièra01 1180x150: Comuna de Tolosa

Actualitats

InternacionalPolitica

Una jutgessa argentina entend un èx-ministre espanhòl per de crimes contra l’umanitat

Los quatre èx-presidents vius del govèrn espanhòl an mandat una letra a la magistrata per defendre l’èx-ministre

Lo 3 de març de 1976, la polícia fusilhet de caumaires a Gasteiz (Bascoat). Lo bilanç foguèt de 5 caumaires mòrts e 150 nafrats per las balas
Lo 3 de març de 1976, la polícia fusilhet de caumaires a Gasteiz (Bascoat). Lo bilanç foguèt de 5 caumaires mòrts e 150 nafrats per las balas
La jutgessa argentina María Romilda Servini entend uèi l’èx-politician espanhòl Rodolfo Martín Villa. Sus el pesa un mandat d’arrèst internacional per de crimes contra l’umanitat dins lo massacre del 3 de març de 1976 a Gasteiz (Bascoat). La jutgessa entendrà l’èx-politician per videoconferéncia dins una transmission que se farà a partir de l’ambaissada d’Argentina a Madrid. Après sa declaracion, la jutgessa deu decidir se l’enseguís per crimes contra l’umanitat coma o reclaman las victimas de la dicha “Transicion“, periòde après la mòrt del dictator Francisco Franco e la mesa en plaça de l’actual sistèma designat coma “democracia”.
 
Servini mena ja, de Buenos Aires estant, un procès contra lo franquisme per crimes contra l’umanitat. Mas per ara lo procès acara l’oposicion del govèrn espanhòl e de sa justícia, que considèra qu’aqueles crimes “son ja prescriches en Espanha”. La jutgessa, pasmens, precisa que s’agís de “crimes contra l’umanitat e que, per tant, aquel delicte se prescriu pas”. Servini a lo sosten de l’ÒNU.
 
 
Lo massacre del 3 de març de 1976
 
Lo 3 de març de 1976, i aguèt a Gasteiz (Bascoat) una jornada de cauma. Los caumaires avián organizat una assemblada dins una glèisa. La polícia i lancèt de gases lacrimogèns per los far sortir e tanlèu que foguèron sortits los fusilhèt. Lo bilanç foguèt de 5 caumaires mòrts e 150 nafrats per las balas. Aqueles faches inspirèron l’album Campanades a Morts de Lluís Llach.
 
 
Letra dels quatre èx-presidents de govèrn espanhòls
 
Dos jorns abans, los quatre èx-presidents de govèrn espanhòls vius –Felipe González, José María Aznar, José Luis Rodríguez Zapatero e Mariano Rajoy– , dos socialistas e dos conservators, mandèron una letra a la jutgessa Servini per defendre lo ròtle de l’ex-ministre Rodolfo Martín Villa pendent los ans après la dictatura dins lo periòde dich de “Transicion”.  La letra la signan tanben lo cap de la diplomacia europèa e èx-ministre espanhòl, Josep Borrell, e qualques èx-dirigents sindicals e politicians.
 
L’esquèrra espanhòla a manifestat son indignacion e lo segond vicepresident del govèrn espanhòl e cap de Podèm, Pablo Iglesias, a denonciat per escrich una “vergonha”.
 

 
 
 
 
 


abonar los amics de Jornalet

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
3.

Lo PSOE (partit dich socialista e obrièr...) sosten los mafioses, dins la persona de l'ex-rei, e los criminals, amb lo Martin Villa.
Es a dire que de VOX als pseudosocialistas, en passant per lo PP e Ciudadanos, son totes complicis.
Cal pòt predendre qu'Espanha es una democracia plena e entièra ?

En mai d'aquò, fan la vida ipossibla a Pablo Iglesais, cap de Podemos e vice-president del govèrnament espanhòl. Amb la femna e lor dos enfants passavan lors vacança Astúrias. Al cap de tres jorns lor calguèt s’entornar. Ont qu’anèsson al restaurant coma èran pas de retaurants pels rics amb intrada susvelhada, una còla de sacamands anavan tustar a las vitras del restaurant per los far cagar. Aquò sens comptar qu’abans, lors enfants son estats secutats tanben.

  • 1
  • 0
francesc palma
2.

Martin Villa, un sant de guix que ni caga ni pix.
Amics recordatz que las bandieras dels trobadors, la provençala e l'occitana es vejan al torn. Força ! Penjadas, amb un mastil per fer la flamejar, damunt l'erba verda, pintad a la carriera,...

  • 1
  • 1
Franc Bardòu
1.

1) « L’actual sistèma designat coma “democracia” » e que continua d'embarrar preisnonièrs politics !!! M'agrada fòrça la delicatessa de la formulacion.

2) Los quatre èx-presidents de govèrn espanhòls vius –Felipe González, José María Aznar, José Luis Rodríguez Zapatero e Mariano Rajoy : dos socialistas e donc quatre conservators ! A pròba ? L’esquèrra espanhòla a manifestat son indignacion e lo segond vicepresident del govèrn espanhòl e cap de Podèm, Pablo Iglesias, a denonciat per escrich una “vergonha”. Lo segond, òc ! Mas pas lo president actual, qu'èra tròp ocupat a ajudar lo Borbon (4 Roses ?) a escapar a la justícia…

  • 13
  • 4

Escriu un comentari sus aqueste article