Bandièra01 1180x150: Comuna de Tolosa

Actualitats

Un tribunal egipcian a ordenat de repetir lo jutjament de Mubarak

A acceptat un recors de l’èx-president contra la senténcia a perpetuitat

Un tribunal egipcian a acceptat una apelacion de l’èx-president tombat, Husni Mubarak, e del sieu èx-ministre de l’Interior, Habib Al Adli, e donc, se repetirà lo jutjament tocant la mòrt de manifestants dins las protèstas de 2011 a la Plaça Tahrir, pendent los jorns de la revòlta. Los dos èx-mandataris foguèron condemnats a perpetuitat, en junh passat, per una errança: òm los considerèt responsables de las mòrts que las fòrças de seguretat causèron en ensajant de reprimir la revòlta. “Lo tribunal a decidit d’acceptar l’apelacion presentada pels acusats e ordena la repeticion del jutjament”, çò a dich lo jutge Ahmad Ali Abd Ar Rahman. Una multitud de seguidors del procès Mubarak a recebut la decision amb jòia.
 
L’èx-dirigent d’84 ans foguèt portat dempuèi la preson fins a un espital militar, a la fin de decembre, après se bresar de còstas en una casuda. “Lo nòu jutjament se basarà sus las primièras pròvas utilizadas dins lo jutjament precedent. S’apondrà pas de nòvas pròvas al cas”, çò a dich a Reuters Muhammad Abd Al Razik, un dels avocats de Mubarak, e a apondut que los jutges poirián prene en compte la santat de l’acusat.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article