Lo president dels Estats Units, Donald Trump, es espitalizat per la covid-19. Se tròba a l’espital militar Walter Reed a Washington. Segon l’Ostal Blanc, lo cap de l’executiu estatsunidenc i es “coma mesura de precaucion” e “presenta de simptòmas coma de fèbre, de tos e de lassièra”. Lo quite Trump enregistrèt un vidèo pels rets socials en anonciant qu’anava a l’espital. Los mètges administran al miliardari un tractament experimental d’anticòrses fach per la societat Regeneron e tanben d’antivirals. Tanben s’es infectada sa femna, Melania Trump.
 
Lo vicepresident estatsunidenc, Mike Pence, es pas estat contaminat. Poiriá assumir la presidéncia dins los jorns avenidors se la situacion de Trump se complicava. Ça que la, Trump a anonciat que trabalha de l’espital estant, ont s’es fach installar un pichon burèu.
 
 
Un mes abans las eleccions presidencialas
 
Tot aquò arriba un mes abans las eleccions presidencialas, que se tendràn lo 3 de novembre, dins un ambient electoral fòrça musclat e quitament descortés.
 
L’infeccion de Trump es un còp dur per sa credibilitat car aviá refusat l’obligatorietat del pòrt de la masca, mesestimat l’importància de la malautiá e refusat los confinaments en priorizant totjorn l’economia dels Estats Units.
 
De son latz, son rival a la presidéncia, Joe Biden, a desirat un lèu restabliment a Donald Trump e a cancelat sa campanha tant que lo president serà espitalizat. Biden es pas infectat, ara per ara.