Bandièra01 1180x150: Comuna de Tolosa

Actualitats

Perpinhan: conferéncia de premsa dels darrièrs tres presidents de la Generalitat de Catalonha

Carles Puigdemont remarquèt que “dins los 6 ans de regne de Felip VI totes los presidents de la Generalitat son estats destituïts”

Los darrièrs tres presidents de la Generalitat de Catalonha, Quim Torra, Carles Puigdemont e Artur Mas; los tres represalhats per las autoritats espanhòlas, faguèron ièr una conferéncia de premsa a Perpinhan. La tòca de l’eveniment foguèt de denonciar la repression espanhòla. O faguèron al mateis moment que lo rei Felip VI e lo president del govèrn espanhòl, Pedro Sánchez, fasián una vesita oficiala a Barcelona marcada per las protèstas per carrièras contra lor preséncia.
 
Lo primièr a parlar foguèt Artur Mas, que denoncièt la repression patida pels tres presidents pel fach d’aver seguit lo mandat de las urnas. Artur Mas demandèt s’èra “normal que dins l’UE del sègle XXI los darrièrs tres presidents d’un territòri de l’UE [foguèsson] eststs represalhats per aver defendut d’idèas e executat d’accions non violentas” o s’èra “etic” que Catalonha [aguèsse] tres presidents perseguits e de presonièrs politics, del temps que lo rei emerit d’Espanha [aviá pogut] fugir amb la complicitat de l’estat. Mas concluguèt que “l’Euròpa dels dreches e las libertats es incompatibla amb l’Espanha de la repression”.
 
Dins son torn de paraula, Puigdemont remarquèt la vesita del rei Felip VI a Barcelona, “lo meteis rei que greugèt los catalans en promovent la fugida de las entrepresas” de Catalonha. A mai, remembrèt que poirián èsser cinc los presidents represalhats se prenèm en compte que Jordi Sànchez e Jordi Turull que lor encarceracion empediguèt lor investidura. Puigdemont assegurèt que persistiriá dins sa lucha politica perque “en defendent los dreches dels catalans [defendián] los dreches umans dins lo Mond entièr”.
 
Enfin, Torra remarquèt que dins las darrièras annadas, lo combat dels catalans per lor autodeterminacion èra venguda una lucha pels dreches civils a causa de l’autoritarisme de l’estat. Tanben diguèt que pendent sa presidéncia aviá verificat los limits de l’autonomia en prenent coma exemple las dificultats qu’aviá rescontradas el coma president a l’ora d’aplicar cèrtas mesuras per combatre la pandemia de la covid-19.

 
 

 
 
 
abonar los amics de Jornalet
 
 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
2.

Euròpa pensa pas qu'al profièch, es una plotocracia coma una autre. L'uman, a despart de ne parlar (declaracions d'intencion sens seguida) se'n fot.

  • 8
  • 0
Franc Bardòu
1.

Artur Mas pensa que “l’Euròpa dels dreits e las libertats es incompatibla amb l’Espanha de la repression”. O pòdi entendre. Mas ai tanben lo sentiment que l'Euròpa qu'el ne nos parla es incompatibla amb la realitat efectiva de l'Euròpa del ponhon e de l'ipocrisia neoliberala ambienta. Es una Euròpa que se chauta ben dels dreits e de las libertats dels pòbles, e que non vòl entendre parlar que dels dreits de de las libertats dels afars… Euròpa non es pas idealista : es fredament cinica, e res mai. Per una Euròpa que defenda los pòbles, las lengas, los creits civics e las dignitats ciutadanas, caldriá una tota autra Euròpa, una que jamai non nos foguèt pas presentada, ni quitament suggerida. Euròpa es una nisal de las sèrps, que non defend que la plotocracia afarista. Çò qu'explica en granda partida son abséncia totala e colpabla (democraticament) de reaccion las foncionaments espanhòl e francés.

  • 15
  • 7

Escriu un comentari sus aqueste article