Bandièra01 1180x150: Comuna de Tolosa

Actualitats

Islàndia a suspendudas las negociacions per intrar dins l’UE

L’aumentacion de l’euroscepticisme e la proximitat de las eleccions n’an motivada la suspension

Lo govèrn islandés a anonciat aquesta setmana la suspension de la negociacion que se debanava per la futura adesion a l’Union Europèa. Lo govèrn de socialdemocratas e d’ecologistas, dirigit per Jóhanna Sigurðardóttir, al poder dempuèi 2009, comencèt fa dos ans de s’encaminar cap a la l’UE per qu’Islàndia se trobèsse pas mai sola en una crisi financièra coma la que visquèt en 2008. L’aumentacion de l’euroscepticisme (se sarra de 60% dins los sondatges), la davalada en las intencions de vòte per la coalicion governamentala e la proximitat de las eleccions, lo 27 d’abril que ven, an empench Sigurðardóttir a paralisar temporàriament las convèrsas.
 
De las trenta tres seccions que fan partida de la negociacion d’adesion, segon lo govèrn, fins ara se n’es tractat vint e sèt, e i a un acòrdi provisòri solament per onze. Fins a las eleccions de la prima, los negociaires islandeses contunharàn de cooperar a las seccions dobèrtas, mas i aurà pas cap de negociacion sus las seccions encara non tractadas, que son las mai importantas perque afèctan la pesca, la principala ressorsa islandesa, e mai l’agricultura.
 
Dos ans après la dobertura formala de las convèrsas, la negociacion avança pas a bon ritme e, per contra, aumenta lo tradicional scepticisme dels islandeses per rapòrt a l’UE. La darrièra enquèsta sus la question, d’octòbre passat, indicava que 60% dels ciutadans i èran opausats. Aquel sentiment s’explica pel conflicte d’Islàndia amb qualques païses de l’UE, tocant las indemnizacions als estalviants estrangièrs en seguida de la falhida de la banca Icesave, mas, tanben, tocant las disputas per las quòtas de pesca e la grèva crisi de la zòna èuro.
 
Parallèlament, los sondatges pronostican la davalada de l’esquèrra e lo retorn al poder del conservator Partit de l’Independéncia, opausat a l’adesion.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

garric
5.

#3 Euròpa es çò que ne fasem...

  • 1
  • 0
Pirolet
4.

Fa qualquas annadas, dempuèi Vigdis Finbogadóttir alà pels ans 80, que son de -dóttir es a dire de femnas que tenon las manetas en Islàndia. Benlèu es per aquò que son capables d'aver de reaccions senadas de cap a la nomenada crisi dins aquel país. An sachut dire a las bancas: Basta! Pas coma nautres que tornam a las meteissas bestièsas coma l'ase quand tròta.

  • 0
  • 0
Ernèst Guevara Jr. L'Avana
3.

A plan rason lo pòble islandés de voler pas dintrar dins Euròpa tala coma va a l'ora d'ara. A l'ora d'ara, aquesta institucion servís a quatre causas sonque :

1) Interdire constitucionalament tota politica realament sociala, realament d'esquèrra, e donc, suprimir los darrièrs vestigis de democracia, per supression de tota possibilitat d'alternança politica.
2) Enriquir los rics, e enricassir los ricasses.
3) Apaurir los paures e apaurassir los paurasses.
4) Botar lo nas jos l'ala tre que s'agís de defendre efectivament (e non pas sonque amb declaracions d'intencion) las minoritats linguisticas, trepejadas e mespresadas per d'estats coma França de sempre e Espanha actuala !

I volètz dintrar, vosautres, dins un fotedor aital ?

  • 3
  • 0
garric
2.

"Sigurðardóttir" ! D'aveire capitat d'escriure aquò, al Jornalet avètz plan meritat un plumon e un tè al mèl...

  • 4
  • 0
Oriol Badalona (Catalunya)
1.

És una decisió encertada tenint en compte com està l'Unió Europea, i les càrregues que ha de suportar de països tant deficitaris com ruinosos

  • 4
  • 0

Escriu un comentari sus aqueste article