L’ors Goiat a perdut son colar GPS que lo geolocalizava. De tecnicians del govèrn d’Aragon trobèron la setmana passada l’esplech après verificar que lo senhal satellit èra estatic al meteis endrech dempuèi lo 15 d’octòbre. A l’ora d’ara, cap d’ors es pas geolocalizat en Pirenèu e se calcula que n’i a aperaquí una cinquantena.
 
Las autoritats francesas an confirmat que tanpauc foncionan pas las transmissions GPS de las orsas Sorita e Claverina. L’autre ors que portava un colar GPS èra Cachou, que lo trobèron mòrt en Aran en abril passat sens que se’n saupèsse la causa. Lo jutge de Vielha manten l’instruccion al secret.
 
 
Un ors agressiu
 
En junh de 2018, lo Conselh General d’Aran demandèt a la Generalitat de Catalonha que se capturèsse e se repatrièsse Goita a causa de son agressivitat. Segon lo sindic d’Aran d’alavetz, Carlos Barrera, l’obsession de Goiat pels cavals dificultava enòrmament las mesuras de proteccion, qu’èran pro malaisidas per l’elevatge equèstre del país de cap de Garona.
 
Goiat lo menèron en junh 2016 passat d’Eslovènia e lo liberèron al centre dels Pirenèus dins l’encastre del programa Piroslife. Aquel nom, que poiriá sonar occitan, foguèt causit en Palhars (Catalonha). En catalan d’aquel parçan tenon l’occitanisme goiat que vòl dire gojat.