Bandièra01 1180x150: País Invisible

Actualitats

crotz-tolosaCreated with Sketch.GuianaCarcinCausse de Limonha

Emocion sul Causse de Limonha per la mòrt d’un jove tuat per un caçaire

S’apelava Morgan Keane, aviá 25 ans, e foguèt tuat mentre que talhava de lenha davant son ostal

| Club photo de Cajarc
Consternacion en Carcin après lo murtre d’un jove sul Causse de Limonha. S’apelava Morgan Keane, aviá 25 ans, e foguèt tuat per un caçaire mentre que talhava de lenha davant son ostal. Una marcha blanca percorrèt las carrièras de la vila per mostrar lo refús e lo dòl dels manifestants. Segon La Dépêche, èra fòrça aimat e participava fòrça a la vida culturala del parçan.
 
Aquò se passèt divendres a l’entorn de 17h. Lo tiraire que tuèt Morgan Keane es un caçaire roergàs de 33 ans e de Montbasens. Aviá son permés de caça dempuèi lo mes de mai e l’an mes en examèn per omocidi involontari. El participava a una batuda al luòc dich la Garriga, entre Cajarc e Calvinhac, convidat per una còla de caçaires del parçan, la Diana carjaquesa. La Garriga es un petit vilatge de la comuna de Calvinhac compausat d’un petit nuclèu e de qualques bòrias e ostals disseminats.
 
Lo procuraire de Caors a precisat que los autres participants “son susceptibles d’aver de responsabilitats” e seràn tanben entenduts per un jutge d’instruccion. Per el, i a pas cap de dobte del caire accidental de la mòrt, mas vòl totun verificar se s’observèt coma cal las règlas de la batuda. Sustot, vòl saber a quina distància los caçaires se trobavan de l’ostal de la victima.
 
Morgan Keane èra un jove nascut a Vilafranca de Roergue. Viviá escassament de petits trabalhs que fasiá dins un paure ostal eiretat de sos parents, de britanics que s’installèron en Carcin fa quaranta ans. Sos amics velhan sus son petit fraire, qu’es ara tot sol.
 
La mòrt de Morgan Keane se passa a un moment sensible durant lo qual d’associacions environamentalistas planhon que se permeta la caça pendent lo confinament, del temps que totes los lésers en plena natura son enebits. La prefectura la justifica per las deterioracions que n’es sospechat lo grand caçum. De fach, lo departament d’Òlt prevesiá de tuar mai de 500 singlars e aitant de cabiròls dins aqueste mes de decembre. De soslinhar que lo president de la Diana carjaquesa es un elevaire del país que planh que cada còp demesigan las adesions a la societat de caça, çò rapòrta Libération.

 
 



abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Righobèrt
1.

Limonha de carcin, un del mai polit parçan del mond, pichon, quantes còps ai corregut pels aquelses ranvèrses. Res que lo nom de limonha es una olfada de remembres que me punhan çaquelà, un viatge dins lo temps, un viatge dins una partida de la familha.

Limonha es coneigut per dos causas, tanlèu lo més de junh se dierp lo mercat a las trufas, la trufa negre del carcin, cada dimenge i es lo mercat. Qualques mots de lenga nòstra te faràn far bona barganha.

La segonda causa plan coneiguda dels caçaires d’estelas es dins aquelses parçans que se troba la nuèch la mai negra de fransa e segur d’Occitània, tanben al mes d’agost se passejan de nuèch los caçaires d’estelas e d’estelas comadas.

Son pas d’airals regandits, son d’airals de granda solessa , se comptan pas los còps ont faguèri lo viatge de Montdomerc entrò promilhanes 35km aperaqui sens vèire cap de vuèituras, te sariás pas enganat de camin ça disiá la femna s’encontra digun ? Siás sol al mond aquíu, es un quicòm de se congostar atanben. Puèi s’aimatz trepar, reganharàs pas de te pausas la vuèitura quitar l’alquitran, quitar los trincaments bels e menuts, per te prene una dralha e camina que caminaràs atal vas descobrir lo mond rufe e druc de la natura arre, cap de trampòl per enlà sonque lo bruches de la divessa natura e tu que bufas, atanca te, para l’aurèlha ! T’anguessas pas perdre çaquela, d’aqui que trobaràs digun , cap d’assistencias sonque tu, las estelas, lo solelh e las pèiras.

Pron siá del viatge

Relarga te ! Bon viatge al dintre de tu meteis !


Relargar, se relargar = keep cool.

  • 5
  • 0

Escriu un comentari sus aqueste article