Bandièra01 1180x150: País Invisible

Actualitats

Almens nòu mòrts dins las protèstas contra lo govèrn curd pel repòrt del pagament dels salaris

Las autoritats curdas acusan lo govèrn iraquian d’èsser colpables de la situacion economica

| @kurdishblogger
I a almens nòu personas mòrtas dins las protèstas contra lo repòrt dels pagaments de salaris als foncionaris de la region autonòma del Curdistan del Sud (Iraq). Las protèstas se tenon dempuèi una setmana dins las províncias de Silêmanî (Sulaymaniyah en arabi) e Helebce (Halabja).
 
Uèch personas son mòrtas a causa de las balas de las fòrças de seguretat curdas o, segon qualques testimònis, de las milícias dels partits governamentals. Lo noven mòrt es un peshmèrga.
 
Segon qualques fonts, i auriá mai de tuats.
 
Los manifestants denóncian que los emplegats publics de la region autonòma curda an pas recebut lors salaris complets dempuèi lo mes de març. Protèstan tanben contra la corrupcion e lo caumatge dins la region. Aperaquí un quart de la populacion del Curdistan del Sud depend dels salaris publics.
 
Qualques manifestants an botat fuòc als burèus dels tres partits curds màgers: lo PDK, l’UPK e Gorran.
 
Lo primièr ministre curd, Masrour Barzani, a acusat lo govèrn federal iraquian d’èsser colpable de la situacion, per aver pas fach los transferiments de fonzes necessaris pel pagament dels salaris. Barzani ditz que Bagdad non complís pas sas “obligacions envèrs Curdistan”.
 
Una delegacion del govèrn curd, dirigida pel viceprimièr ministre Qubad Talabani, es a Bagdad a negociar amb los ministèris de las finanças e del petròli.
 
Uèch organizacions iraquianas e internacionalas pròdreches umans an emés un comunicat qu’acusa las autoritats curdas de restrénher las libertats publicas dempuèi agost e d’aver detengut de desenas de personas, compreses d’activistas socials e de jornalistas, que protèstan contra la corrupcion e lo repòrt dels pagaments dels salaris, o quitament qu’o rapòrtan.
 
Lo comunicat denóncia tanben las detencions que las fan las autoritats iraquianas dempuèi 2019, per de rasons similaras.
 
 

 

Aquesta nòva es adaptada de Nationalia amb qui Jornalet ten un acòrdi de cooperacion.
 


abonar los amics de Jornalet

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article