Bandièra01 1180x150: País Invisible

Actualitats

Iran demanda a Interpòl la detencion de Donald Trump

Après una “enquista exaustiva” demandan l'arrestacion de Trump e de 48 autras personas presumidament responsablas de l’assassinat del general Qasem Soleimani fa un an

Las autoritats d’Iran an sollicitat a lnterpòl la detencion del president dels Estats Units, Donald Trump, e de 48 autras personas presumidament responsablas de l’assassinat del general Qasem Soleimani fa un an. Dins la lista de personas d'arrestar qu’Iran a donada a l’organizacion internacionala de la polícia criminala i a de comandants militars, segon de fonts iranianas qu’asseguran qu’an menat a bon tèrme una “enquista exaustiva”.
 
Es fòrça probable que la demanda d’Iran a Interpòl venga sonque quicòm de simbolic. L’organizacion internacionala de la polícia deu, abans tot, far una enquista per determinar se la sollicitacion es fondamentada. Segon lnterpòl, i a environ 62 000 sollicitacions d’aquela sòrta.
 
Lo ministèri public d’Iran emetèt en junh passat un mandat d’arrèst internacional contra Trump. E dimenge passat, anniversari del murtre, las principalas autoritats iranianas faguèron tornarmai una crida a la venjança. Après lo bombardament, Iran ataquèt divèrsas basas militaras iraquianas qu’i son presentas de tropas estatsunidencas.
 
Lo general iranian Qasem Soleimani, cap de la Fòrça Quds de la Gàrdia Revolucionària d’Iran, e lo soscap de la coalicion de milícias majoritàriament shiitas iraquianas Unitats de Mobilizacion Populara, Abu Mahdí Al Muhandis, foguèron assassinats lo 3 de genièr de 2020 amb de missils a l’aeropòrt internacional de Bagdad. Los Estats Units revendiquèron l’atemptat, segon un comunicat oficial qu’assegurava que lo quite president, Donald Trump, aviá ordenat l’ataca amb la tòca de “dissuadir” Iran. Qualques oras après l’ataca, l’ambaissada dels Estats Units a Bagdad demandèt a totes los ciutadans estatsunidencs que quitèsson Iraq.
 
 

 
abonar los amics de Jornalet

 

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc Palma
1.

L'unica causa qu' a fait ben aqueste bossot d'ome president a estat aturar la guerra de Siria. Tota la resta coma los crims amb droms a seguit fent o coma d'altres presidents criminals, entre els qual Hillari Clinton e lo tan alabat Obama.

  • 1
  • 0

Escriu un comentari sus aqueste article