Lo Tribunal Administratiu de París reconeis, dins una senténcia dicha dimècres passat, la responsabilitat de l’estat francés dins la crisi climatica. Lo tribunal reconeis pel primièr còp que l’estat a comés una fauta d’inaccionclimatica en podent pas complir sos engatjaments de reduire los gases d'efièch de sèrra pendent lo periòde 2015-2018, çò rapòrta Reporterre.
 
Las organizacions qu’avián fach lor denóncia, Oxfam France, Nòstre afar de totes, la Fondacion per la Natura e l’Òme e Greenpeace França, an manifestat lor jòia per la senténcia, dos ans après lo començament del procès qu’a comptat amb lo sosten de 2,3 milions de personas.
 
Las organizacions environamentalistas considèran que la senténcia es una “victòria istorica pel clima e una granda avançada dins la legislacion francesa”. Tanben considèra qu’es “una victòria per la vertat”, vist que l’estat fins ara a refusat de reconéisser que sas politicas contra lo cambiament climatic èran insufisentas “malgrat l’amolonament d’evidéncias”. Dins aquel sens, asseguran que “se la nòva Lei del Clima d’aqueste govèrn es insufisenta” espèran que “la justícia se limitarà pas a reconéisser la fauta de l’estat, mas que l'obligarà tanben de prene de mesuras concretas per, almens, complir lors engatjaments climatics”.
 
De son costat,  l’avocat Arnaud Gossement a precisat sus Twitter que “s’agís d’un jutjament «abans dire drech». “Lo jutjament definitiu serà rendut après un suplement d’instruccion de dos meses. Cal esperar aquel segond jutjament per saber se serà «istoric»”, çò ditz.