La formacion aranesa Es Paums presentèt diluns passat lo videoclip Oxitònia, una cançon facha sus un poèma de Xavi Gutiérrez. Es lo seten trabalh musical que la banda de Vilamòs consagra a metre en musica los poètas araneses. 
 
An participat al clip un vintenat d’actors del país, guidats per la realizaira e actritz catalana Mireia Llunell. L’a realizat Paranoide Films amb la collaboracion de Pirineos Drone e s’es finançat amb l’ajuda de la comuna de Vilamòs e de la Generalitat de Catalonha.
 
Xavi Gutiérrez es a l’ora d’ara un dels poètas araneses mai coneguts. Sa darrièra publicacion es Bestiauuu! Amàs poetic de bèsties, bestiòtes e bestieses (2019), una òbra amb una illustracion e un poèma per cadun dels animals de la fauna aranesa, e amb un vocabulari restacat, qu’es estat distribuït dins las escòlas de la Val d’Aran.
 
Es Paums son una banda musicala fondada a Vilamòs (Val d’Aran) en 1971, que pendent los ans 1980 e 1990 agiguèron coma orquèstra de bal per tot l’estat espanhòl. Actualament son venguts una associacion fòrça activa per la lenga, la cultura e la musica.
 
 
 

 

fffff		fffff
	Oxitònia   Bastiram un país nau damb paraules oxitones, tà que non mos hèsquen mau ne damb bombes ne damb hones   non credem enes pistòles ne tanpòc enes gabiòles, esborrem es epitafis desbastim es cenotafis   non volem cap mès monarca qu’eth nòste rei: Sent Pançard, mo’n trufaram dera Parca e viueram ar azard aboliram es doctrines, cremaram es guilhotines, qu’èm un pòble atalentat de bistèc e libertat   desarmaram as soldats e lançaram en abisme toti es ismes impausats, servitud, colhonialisme   entà tornar a començar, damb pro temps tà romançar e soniar un nau avier qu’entre toti haram a vier     Xavi Gutiérrez Riu