Bandièra01 1180x150: Comuna de Tolosa

Actualitats

Internacional

Dimenge de sang en Birmania: almens 18 manifestants mòrts jos las balas de la polícia e de l’armada

La polícia e l’armada an emplegat de municion reala, de balas de cauchó, de gas lacrimogèn e de grenadas ensordantas contra los manifestants

| @MinMyoAung11
Dimenge de sang en Birmania. La polícia e l’armada reprimiguèron dimenge passat l’enena manifestacion contra lo putsch militar amb tota sòrta d’armas antisusmautas e tanben amb de fuòc real. Lo bilanç es esglasiant: almens 18 personas mòrtas e mai de 30 nafradas.
 
La nauta comissària de l’ÒNU pels dreches umans, Michelle Bachelet, assolida que los mòrts foguèron tuats amb “lo fuòc amb municion reala contra los manifestants” a Rangun, Dawei, Mandalai, Bago, Pokokku e Myeik. Las fòrças de seguretat aurián fach fuòc de forma indiscriminada per reprimir las manifestacions massissas.
 
Mas las protèstas contunhan. Lo govèrn putschista de Birmania ensagèt de las arrestar en ordenant a totes los operators de blocar l’accès a Internet. Pasmens, la repression mortala a pas quitament descoratjat los manifestants que prenon encara las carrièras cada jorn per fin d’exigir la libertat dels detenguts après lo còp d’estat.
 
De son caire, l’Union Europèa a avertit lo govèrn putschista que “la violéncia lor donarà pas de legitimitat”. 
 
Lo 1r de febrièr, l’armada arrestèt Aung San Suu Kyi e d’autres dirigents del partit al govèrn, prenguèt lo poder sul país e declarèt l’estat d’urgéncia en tot acusar de frauda las eleccions legislativas de novembre passat. Lo putsch lo faguèron lo meteis jorn que se deviá constituir lo parlament sortit de las eleccions del 8 novembre amb una Aung San Suu Kyi plan refortida. La cap birmana e son partit istoric d’oposicion a la dictatura aviá ganhat clarament las eleccions vistas coma un referendum sus la gestion del govèrn de la filha del paire de l’independéncia birmana.
 
 
 
 


abonar los amics de Jornalet

 

 

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

L'armada militara Birmana golpista auria de ser arrestada e empresonada per las forças de l'ONU.

  • 2
  • 0

Escriu un comentari sus aqueste article