Bandièra01 1180x150: Comuna de Tolosa

Actualitats

Los neandertalians podián parlar coma nosautres

Caduna de las lengas neandertalianas podiá èsser plan diferenta de l’autra e al luòc ont tanben viviá nòstra espècia benlèu l’accent èra semblable

| Stefan Scheer
E òc, amb la tòca de balhar una responsa a la question (que fa de decennis qu’es discutida) sus se los neandertalians podián parlar coma nosautres, una còla internacionala trabalhèt durant 20 ans. Lor conclusion es estonanta; òc, podián parlar e plan coma nosautres.
 
L’estudi analisèt l’estructura de l’aurelha de divèrsas espècias omininas dont la nòstra, Homo sapiens sapiens, la neandertaliana e encara d’umans arcaïcs mai ancians. Après una longa analisi, la responsa èra clara de biais incontestablament scientific: podián ausir e parlar coma nosautres.
 
Per far tot aquò, los cercaires farguèron divèrses modèls virtuals en 3D de l’estructura mejana e exteriora de l’aurelha d’aquelas tres espècias que lors fossils foguèron trapats sul sit arqueologic d’Atapuerca, dins l’estat espanhòl. Puèi l’informacion foguèt donada a un ordenador que demostrèt que las tres espècias ausir fins als 5 quilohèrtzes, nòstra frequència mejana quand parlam.
 
 
Una melhora ausida
 
L’estudi, ara publicat dins lo numeric Nature Ecology and Evolution, demostrèt tanben que los neandertalians podián ausir melhor que lors ancessors, çò que seriá logic segon la teoria de l’evolucion umana. Mas quina podiá èsser estada la lenga emplegada pels neandertalians?
 
Es evident que n’i aguèt mai d’una, coma pels umans modèrnes. Per exemple, la lenga kaa, parlada en Botswana e Namibia, ten fins a 100 consonantas desparièras mentre que l’anglés a sonque, en mejana, 45 sons. Caduna de las lengas neandertalianas podiá èsser doncas plan diferenta de l’autra e al luòc ont tanben viviá nòstra espècia benlèu l’accent èra semblable.
 
“Los neandertalians e Homo sapiens sapiens avián de capacitats lengatgièras e auditivas parièras, çò diguèt Mercedes Conde-Valverde, de l’Universitat d’Alcalá, que dirigiguèt aquel estudi. L’analisi fach es solid e mòstra d’un biais clar que los neandertalians podián non solament ausir mas tanben parlar de la meteissa manièra que nosautres”.(Legissètz la seguida).




 
Aqueste article es publicat dins Sapiéncia, la revista occitana de divulgacion scientifica, amb la quala Jornalet a un acòrdi de cooperacion. Podètz legir l'article entièr aicí.



abonar los amics de Jornalet

 
   

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Nas de guit
3.

#1 Plaf! Dab aqueth sistèma de pensada, que seretz estat d'aqueths europèus qui creden qu'ua lenga africana a un vocabulari de tres cents mots...

  • 1
  • 0
Pitaluga
2.

Abans auriái dich que de neandertalians n'i a encara, que son al govèrnament e al cap de miliards d'euros, dolars, yens, eca. coma lo Bernard Arnaud o la còla dels maufatans dels GAFA.
Mas ara que sabèm que los neandertalians èran pas tan atardivats coma o voliá creire lo sapiens sapiens que se la pèta d'ufanós qu'es, o dirai pas pus.
Emai presenti mas excusas a nòstres ainats per 1 o 2 % (çò sembla d'après las darrièras recèrcas).

  • 5
  • 1
francesc palma
1.

Es qu' es natural que parlasen amb la lenga coma nosautres. Segur que non parlavan fin coma los trobadors e trobairitz, devien pegar bramuls e crits e cops per tot arreu, siulets, xisclar e tota classa de petar. Mas arribaren pauc a pauc a formar un vocabulari petit casolar. Aissò es dirà una bufetada: plaf ! O comprenes?

  • 2
  • 4

Escriu un comentari sus aqueste article