L’afar Valtònyc a obligat la justícia bèlga de s'interrogar sus una lei de 1847. Lo cantador malhorquin de rap, Josep Miquel Arenas, de nom d’artista Valtònyc, se tròba en exili en Belgica, e Espanha demanda son extradicion per un delicte d’enaurament del terrorisme pr’amor de las paraulas d’una cançon contra lo rei emerit, Joan Carles Ir. En Belgica, los afronts al rei son un delicte segon una lei de 1847 qu’èra tombada dins la desmembrança. Ara la Cort Constitucionala bèlga es a decidir s’aquela lei s’ajusta a la legislacion actuala e al drech internacional dels dreches umans, e o deu far per saber se deu liurar lo cantador malhorquin a Espanha.
 

Crida d’Amnestia Internacionala

Mentretant, Amnestia Internacionala (AI) a fach una crida als estats bèlga e espanhòl per que protegiscan la libertat d’expression de Valtònyc. Demanda que Belgica “complisca sas obligacions en matèria de dreches umans en facilitant pas lo liurament de Valtònyc a Espanha”, ont l’embarrarián en preson “sonque per aver exercit son drech a la libertat d’expression”.
 
A mai, AI demanda a Espanha de retirar lo mandat d’arrèst europèu e de suprimir del còde penal los delictes d’enaurament del terrorisme e d’afronts a la Corona.