Bandièra01 capçalera 1180x150: Botiga

Actualitats

InternacionalSocietat

Catalonha: de filhas d’onze ans vòlon magrir a causa de la pression estetica

Una ensenhaira crida ajuda en remarcant que totas sas escolanas d’11 ans vòlon far dièta

En Catalonha, una ensenhaira a fach una crida après constatar que totas sas escolanas d’11 ans volián magrir, çò rapòrta la Television de Catalonha. Dins son cors de 6a, l’ensenhaira aviá demandat a sos escolans quatre resolucions de menar a bon tèrme long de l’annada, e s’esglasièt en remarcant qu’absoludament totas las filhas avián respondut que volián magrir. “Me cal d’idèas d’obradors, de dinamicas o de qué que siá per desvolopar e melhorar lor autoestima”, çò ditz l’ensenhaira dins una crida facha a las autoritats e suls rets socials.
 
“Soi fòrça inquieta. Sabi que tot aquò es influenciat pels rets socials, Instagram e Tik-tok, mas de verai m’inquieta que de personas tan pichonas ajan totes aqueles complèxes e inseguretats”, çò a dich l’ensenhaira en apelant a “quina sòrta d’ajuda que siá”.
 
La professora a parlat amb las dròllas e lors comentaris son aitan esglasiants:
 
— “Vesiái totas las influenciairas qu’èran fòrça magras, qu’avián un còrs fòrça polit e alavetz pensavi: «Perqué ieu soi pas tan perfiècha coma elas?», e aquò m’aclapava”.
 
— “Me vesi fòrta a las ancas e un pauc de ventre; vòli doncas magrir de tira per eliminar aquelas causas que m’agradan pas”.
 
Segon l’Associacion Contra l’Anorexia e la Bolimia, lo 34% de las adolescentas catalanas an ja fach dièta per magrir. Lo cas de las occitanas deu pas èsser gaire diferent.
 

 


abonar los amics de Jornalet

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
5.

#1
Lo Jacme Taupiac explica fòrt plan qu'en occitan blos es : l'onze, d'onze, eca.

  • 0
  • 0
Conformisme e conformisme...
4.

E oc, las pichonas de onze ans volon magrir ! A l'origina d'aquela tissa om denoncia los rets socials que son pas que la consequencia logica de l'ideologia bauja de la societat de consum. Mas quand aqueles enfants (drolles o drollas) totjorn jos l'influència tan bauja de l'ideologia d'aquesta societat de consum e dels rets socials declaran en nombre creissent que voldrian tanben cambiar de sèxe, aqueste cop sètz lèu pregats d'aplaudir jos pèna de passar per un orre fachista. Cercatz l'error...

  • 14
  • 29
Nas de Guit
3.

#1 "l'onze", tà jo, qu'ei la forma occitana corrècta; "lo onze" qu'ei devut a l'influéncia deu francés. Jan Victòr Lalana qu'escriu: "l'onze de seteme 1921".

  • 10
  • 4
Pau
2.

#1
Ieu diriái que "l'onze" seriá normal encara que semble pas comun en rason de l'influéncia francesa mas es una question que caldriá estudiar pus a fons per conéisser l'usatge vertadièr que se'n fasiá.
Per contra, "uèch", coma "uèi", etc., e tanplan "Yoann" (s'i cal metre un article definit davant), mas tanben mots coma "oelha", etc., es pas brica la meteissa question ja qu'aqueles mots començan pas per una vocala mas per une semiconsonanta (o semivocala). Atal, la lenga ditz "la oelha" (sovent en tot ajustar una -g- anti iatica, en mai > la goelha) e non pas "*l'oelha". Idèm se ditz "lo jorn de uèi" e non pas "lo jorn *d'uèi" (de còps en ajustant una -d- > "lo jorn de duèi" que fa "duèi" tot solet coma "oelha" fa "goelha"). Tanben, entà nosaus disèm "le uèit de març" sense cap d'esitacion.
Idèm amb "que": "l'òme qu'es aquí" mas "l'òme que i a aquí".

  • 11
  • 3
Quentin Tolosa
1.

Bon mon comentari es pas sul fons...
Mas vesi "d’onze ans". E fa qualques setmanas que me demandi se cal dire :
Lo onze de novembre o
L'onze de novembre

L'occitan sèc lo catalan (l'onze) o lo francés (lo onze) ?
Meteissa question amb uèch e lo mots estrangièrs en Y, coma Yoann.

  • 1
  • 3

Escriu un comentari sus aqueste article