Bandièra01 1180x150: País Invisible

Actualitats

Estats Units: la mòrt d’un autre jove negre tuat per un policièr descadena d’autras protèstas

La policièra assegura que confondèt l’arma de fuòc amb lo pistolet Taser

Tèxte legit

La mòrt d’un autre jovenòme negre jos las balas de la polícia als Estats Units a entraïnat mai de protèstas del movement Black Lives Matter. La victima es Daunte Wright, que lo tuèt dimenge passat una policièra pendent un contraròtle de circulacion a Brooklyn Center, una vila de la banlèga de Minneapòlis. La policièra assolida que confondèt l’arma de fuòc amb lo pistolet Taser. Wright aviá una filha de 2 ans.
 
Segon la polícia, faguèron arrestar la veitura que la menava Wright après un accident, e remarquèron que i aviá un mandat d’arrèst contra el. Un agent ensagèt de l’arrestar quand tornava dins la veitura e li tirèt dessús mortalament. Wright èra acompanhat de sa calinhaira, que patiguèt pas cap de lesion mas assistiguèt a tota la scèna.
 
Aqueste enen abus policièr acusat de racisme a luòc just al moment que se debana lo jutjament de l’èx-policièr Derek Chauvin per l’assassinat de George Floyd, que provoquèt una èrsa enòrma de protèstas antiracistas. Ara, las protèstas se tenon sustot a Brooklyn Center, e mai lo cònsol màger aja impausat un cobrifuòc a 18h per evitar las manifestacions.
 
De son latz, lo governador de Minessòta, Tim Walz, a escrich sus Twitter que seguís de près la situacion a Brooklyn Center e que sa femna e el prègan per la familha de Wright “car [lor] estat es en dòl per una autra vida d’un negre panada per la polícia”.


 
 
 




abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
3.

Non cresi qu' es puga confondre una arma de matar amb una arma no letal. Que la detengan per vida e que jamai pus puga tornar a ser policia.

  • 4
  • 0
Mèfi! 31
2.

(dia)critica de l’inglés :)
MinneApolis = Minneàpolis
MinnesOta = Minnesóta (o:)

  • 0
  • 4
Pitaluga
1.

La vidèo daissa perplèxe sus las responsabilitats de cadun. Ne cal saupre mai abans de cridar al lop !

  • 5
  • 0

Escriu un comentari sus aqueste article