Bandièra01 1180x150: Comuna de Tolosa

Actualitats

InternacionalPolitica

Turquia: a començat lo jutjament dels 108 politicians de l’HDP

Los acusan dels rambalhs de manifestacions en solidaritat amb Kobanê, mas s’es pas pogut enquistar suls faches. Dins los rambalhs moriguèron 37 personas

| Dîlan

Tèxte legit

Comencèt diluns passat a Ankara (Turquia) un procès penal contra 108 curds qu’en 2014 avián manifestat contra l’assetjament de Kobanê per l’autoproclamat Estat Islamic. Lo ministèri public los acusa “d’aver destorbat l’unitat e l’integritat territoriala de l’estat”, d’aver cremat la bandièra turca e d’èsser responsables de la mòrt de 37 personas. Demest los 108 acusats i a los dirigents pus importants del Partit Democratic del Pòble (HDP), nòu deputats del parlament turc e qualques cònsols màgers. 38 acusats riscan una pena de perpetuitat.
 
A aquel moment i aguèt una enquista sus las susmautas que se desencadanèron durant aquelas manifestacions, e l’afar foguèt archivat sens cap de pena. Mas, dins la davalada passada, lo procuraire general de Turquia decidiguèt de tornar dobrir lo dorsièr, e se detenguèt un fum de politicians de l’HDP, dont de deputats e cònsols màgers. L’acusacion assegura que las protèstas las organizèt lo grop armat del PKK amb l’HDP.
 
D’autre caire, la Cort Constitucionala turca a dobèrt un procès contra l’HDP amb la tòca d’illegalizar lo partit e de declarar inelegibles unes sèt cents politicians.
 
 
Las protèstas de 2014
 
Kobanê es una vila del Curdistan de l’estat sirian que se tròba just a la frontièra turca. Dins la tardor de 2014, los curds que resistissián a l’ataca de l’Estat Islamic sollicitavan la dobertura de la frontièra per evacuar los civils. Los abitants demandavan l’intervencion de l’ÒNU e de la comunautat internacionala. “Se l’Estat Islamic arriba al centre vila, i aurà un chaple. La sola sortida es de prene alen e d’obténer d’armas. Los bombardaments estatsunidencs son pas eficaces. Fa 26 jorns que resistissèm. Volèm lo sosten de la comunautat internacionala e de l’ÒNU”, çò disiá alavetz Ismet Sheikh Hassat, cap dels curds de Kobanê.
 
Mas Turquia refusèt de dobrir la frontièra e mai la refortiguèt jos l’escampa d’evitar l’intrada de milicians curds, ja que Turquia los reprimís dempuèi longtemps.
 
Alavetz, l’HDP cridèt lo mond a manifestar per carrièras e mostrar lor indignacion pel genocidi que patissián lors fraires a Kobanê. De desenas de milièrs de personas se mobilizèron dins las províncias de majoritat curda; a Ankara e Istambol, los afrontaments amb la polícia provoquèron 37 mòrts entre lo 6 e lo 12 d’octòbre de 2014.
 
De soslinhar que l’HDP a demandat una comission parlamentària qu’examinèsse aquelas protèstas, e que las autoritats turcas o an refusat.
 
 
Sosten de l’esquèrra europèa
 
En Euròpa, los presidents del Partit de l’Esquèrra Europèa, del Partit Verd Europèu, de l’Aliança Liura Europèa e del Partit Socialista Europèu an fach una declaracion de solidaritat, denóncian que lo procès es una violacion de l’estat de drech e afirman qu’“es inacceptable que se responsabilize los elegits per de faches que se passèron pendent un eveniment que se n’empacha activament l’enquista”.
 
 
D’armas turcas per l’Estat Islamic
 
Cal remarcar que tot aquò genèra encara mai d’ombras se prenèm en compte que lo jornalista Can Dündar, ara en exili, publiquèt al començament de 2015 un vidèo, autentic e verificat, que demòstra que los servicis secrets avián donat d’armas de guèrra a l’Estat Islamic.
 
 
 
 
 
 
 
 
 
 
abonar los amics de Jornalet
 
 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article