Bandièra01 capçalera  1180x150: Novestivada

Actualitats

Procès dau comando de la faculat de drech de Montpelhier, lei 20 e 21 de mai

Los estudiants en cauma de l’universitat de Montpelhièr foguèron, en març de 2018, victimas d’una agression sens  precedents
Los estudiants en cauma de l’universitat de Montpelhièr foguèron, en març de 2018, victimas d’una agression sens precedents

Fa tres ans, de militants d’extrèma drecha expulsavan violentament d’estudiants qu’ocupavan un anfiteatre de la facultat de drech de Montpelhier per protestar contra la seleccion a l’universitat. Lo procès deis agressors se tendrà lei 20 e 21 de mai au tribunau de granda instància de Montpelhier, Plaça Pèire Flòta.


22 març de 2018. De miliers de liceans e d’estudiants manifèstan a Montpelhièr contra la seleccion a l’universitat. Puei de centenas d’elei investisson la facultat de drech per una granda assemblada generala. L’ocupacion es votada. Sus plaça, lo decan Philippe Pétel fulmina.
 
Au moment dau calabrun, un desenau d’ocupants demòran e un ceucle de fidèus si forma a l’entorn dau decan. Au primier plan apareis Jean-Luc Coronel, autoproclamat "de Boissezon", reialista assumit. Sona sa companha Patricia Margand, candidata au FN ai darrierei legislativas. Ela respònd a l’apèl e aganta seis amics sus lo parquing dau prestigiós castèu de Flaugergue, ont ven d’assistir a un acamp de la Manif pour tous, e sona quauquei collègas. Una chorma si forma.
 
Pròche la facultat si retròban Martiel Roudier, militant de la Liga dau Miegjorn, condemnat per aver emponhalat un adolescent antifaissista, Jordi Vives Carceller, militant dau meteis grop e creator dau site identitari Lengadoc-Info, Thierry Vincent, retirat militar, Mathieu Rolouis, ajustaire setòri pròche dau FN, Thierry Puech e Jean N. L’objectiu es clar: picar de senestrista. Jordi rèsta a despart e Jean pretèxta un mau de gamba per s’extirpar. Leis autres charran amb Philippe Pétel e Emilio Tedeschi, responsable dau servici tecnic e seguretat. Leis ocupants que son demorats son comptats, leis agents de seguretat son prevenguts e lei fidèus si sarran dins un canton. Amb Jean-Luc Coronel, lo comando, en partida cagolat e armat d’un tasèr e de tròç de paletas, tustan violentament e expulsan leis ocupants. Philippe Pétel e lei fidèus pican dei mans. Lo decan creida la polícia: “Aviam de crapulas qu’avián envasit la facultat, mas leis avèm mes defòra, doncas ara siam tranquils”.
 
Lo 29 de març, Philippe Pétel e Jean-Luc Coronel son plaçats en garda a vista e mes en examen. Lo primier pretend d'aver confondut lo comando amb “una avantgarda de la polícia” e lo segond evòca sa “legitima defensa”. Lo 11 de setembre de 2018 son plaçats en garda a vista Patricia Margand, Martial Roudier, Mathieu Rolouis, Thierry Puech, Thierry Vincent, Jean N. e Jordi Vives Carceller. Aquest es pas estat deferit maugrat lei nombrós apèls amb Patricia. Au moment deis audicions, lei gardats a vista s’incriminan e si delatan leis uns leis autres.
 
Au procès lei 20 e 21 de mai au tribunau de granda instància de Montpelhier, Philippe Pétel e Patricia Margant compareisson per complicitat de violéncia, e Thierry Vincent, Thierry Puech, Mathieu Rolouis, Martiel Roudier e Jean-Luc Coronel de violéncias volontàrias.
 
 
 
 
 
Extrach d’un article de Le Poing, revirat per Alice Pascal
De retrobar l’article complet aicí
 
 
 
 
 
abonar los amics de Jornalet

 

 
Assemblada generala a la fac de drech de Montpelhièr lo 22 de mars dau 2018
Assemblada generala a la fac de drech de Montpelhièr lo 22 de mars dau 2018

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
4.

La facultat de drech de Montpellièr es tòrta dempuèi bèl temps. Quin clapassièr se soven pas de l'epòca del Jean-Claude Martinez, del Front National ?

  • 1
  • 0
Claude Cahors
3.

Le petit gros avec son bout de bois, le jour où il faudra courir, il va pas aller bien loin l'obèse !

  • 2
  • 0
francesc palma
2.

Quina pinta de bestia bruta que ten lo de la foto amb lo garrot.

  • 5
  • 0
Julien Berlin
1.

Ara Jean-Luc Coronel trabalha per la pseudo-escòla de Marion Maréchal Le Pen, a Lion e Madrid.
https://www.mediapart.fr/journal/france/100521/ecole-de-marion-marechal-anatomie-d-un-fiasco

  • 8
  • 0

Escriu un comentari sus aqueste article