Los caps del G7 se son engatjats a donar en 2022 un miliard de vaccins contra la covid-19 als païses pus paures. Après una reünion de tres jorns en Cornoalha, los dirigents de las grandas poténcias mondialas an dich que caliá accelerar la produccion e la distribucion dels vaccins amb la tòca que lo 60% de la populacion mondiala foguèsse vaccinada per “metre lo ponch final a la pandemia en 2022”. “Una immunizacion larga es un ben public global”, çò ditz lo comunicat. De remembrar que lo G7 es compausat dels Estats Units, de Canadà, de Japon, d'Alemanha, de França, d'Itàlia e del Reialme Unit.
 
Ça que la, i a pas encara d'acòrdi entre aqueles estats sus l’eliminacion dels brevets dels vaccins. Mentre que los Estats Units e França se mòstran favorables a lor suspension temporària, Alemanha e lo Reialme Unit s’i opausan.  “Explorarem totas las opcions per garentir de vaccins accessibles als païses pus paures, compreses la produccion sens tòca lucrativa, la fixacion e transparéncia de prèses, e tanben lo partatge de part dels fabricants d’una proporcion de produccion al COVAX”, çò assegura lo comunicat dels sèt païses en referéncia al programa de l’OMS per mandar de vaccins als païses que los pòdon pas pagar. A mai, se son engatjats a negociar constructivament l’afar dels brevets.
 
 
De criticas contra China
 
Lo G7 a exigit de China que respècte los dreches umans dels oigors e l’autonomia d’Hong Kong. Contunharàn tanben a susvelhar las ajudas estatalas que dona lo govèrn chinés a las entrepresas perque, çò dison, “soscavan las operacions justas e transparentas de l’economia mondiala”. Coma èra de preveire, lo G7 a demandat una enquista transparenta e dirigida per d’expèrts sus las originas de la pandemia en China. Malgrat las criticas, lo G7 vòl cooperar amb Pequin “en de domenis d’interès comun, particularament per combatre lo cambiament climatic”.