Louis Mapou serà, a partir de la setmana que ven, a l’encòp lo primièr president canac e lo primièr president independentista de la Nòva Caledònia après l’acòrdi dels diferents partits que compausan lo govèrn de l’archipèla. Un dels principals enjòcs de Mapou serà d’organizar en decembre lo tresen e definitiu referendum d’independéncia après l’estrecha victòria dels unionistas franceses dins los dos vòtes precedents.
 
Lo vòte que se tenguèt al Congrès de la Nòva Calendònia lo 17 de febrièr passat obtenguèt una majoritat independentista. Pasmens, los partits independentistas an preses cinc meses per arribar a un acòrdi per elegir lo president. La majoritat de l’executiu a finit que s’es atencha gràcias al pache que los independentistas faguèron amb lo partit Desvelh Oceanian, que representa los interèsses de la comunautat originària de las illas de Wallis e Futuna e que donèt pas cap de consigna de vòte al referendum de 2020.
 
Lo 2 de febrièr passat, las fòrças independentistas e autonomistas tombèron lo govèrn de Thierry Santa; demissionèron a causa de lor desacòrdi sus la venda d’una importanta usina de niquèl a una societat brasilièra.