Los presonièrs politics catalans graciats e los exiliats s’amassèron divendres passat en Catalonha Nòrd a l’ocasion del 60n anniversari d’Omnium Cultural, l’associacion que dempuèi 1961 trabalha per la lenga e la cultura catalanas e per l’identitat dels Païses Catalans, e que son president, Jordi Cuixart, es un dels principals represalhats pel referendum independentista del 1r d’octòbre de 2017.
 
L’eveniment foguèt marcat per l’assisténcia de l’ex-deputada de la CUP, Anna Gabriel, en exili en Soïssa; mas sustot per la crida a l’unitat de l’independentisme, que la faguèt Cuixart dins son discors; un discors qu’escotavan Carles Puigdemont e Oriol Junqueras.
 
“Aqueste rescontre es una victòria de la societat catalana”, çò diguèt Cuixart, en tot soslinhar qu'Òmnium renonciariá pas jamai a defendre la lenga, la cultura e l’exercici dels dreches fondamentals, coma l’autodeterminacion. “O farem tornarmai, o farem ensems e o farem melhor”, çò diguèt per referéncia al referendum del 1r d’octòbre de 2017.
 
A prepaus de la repression, Cuixart comentèt: “Sèm de victimas d’aquesta persecucion tan ferotja perque Espanha sap que podèm ganhar. Podèm véncer e aquò depend solament de nosautres.” E apondèt qu'Òmnium contunhariá d'èsser exigent amb los politicians e las institucions catalanas, mas amb leialtat.
 
Demest los participants cal soslinhar la preséncia de Carme Forcadell, Joaquim Forn, Josep Rull, Jordi Sànchez, Toni Comín, Clara Ponsatí, Lluís Puig, Pere Aragonés, Laura Borràs, Jordi Puigneró, Albert Batet, Alba Vergés, Meritxell Serret, Elsa Artadi, Cristina Casol, Francesc de Dalmases, Jenn Díaz, Glòria Freixa, Josep Rises, Ruben Wagensberg, Dolors Sabater, Eulàlia Reguant, Carles Riera, Montserrat Vinyets e Albert Botran.

 

Contra la voluntat dels poders de l’Estat avui ens hem pogut retrobar amb els companys de l’exili. Emoció absoluta i compromís intactes. Serem el que vulguem ser! Sempre endavant! #omnium60pic.twitter.com/o3uOwnBgKV

— Jordi Cuixart (@jcuixart) July 16, 2021