Los amics de la Baragonha, l’animal totemic de Sant Cristòu (Costièra de Nimes), an organizat la clavadura de l’edicion d’ongan del Total Festum, un magnific final qu’èra estat plebiscitat per un vòte ciutadan en 2020. Atal, entre las vinhas, Sant Cristòu aculhiguèt los 3 e 4 de julhet la fèsta finala d’aquel festenal de las lengas catalana e occitana que dempuèi lo mes de mai a portat la cultura a mai d’un centenat de comunas de Lengadòc, Comenge, Bigòrra e Catalonha Nòrd.
 
Malgrat la pluèja, foguèt una dimenjada fòrça rica d’activitats gratuitas, en catalan e en occitan, a l’entorn de la musica de la dança e de la gastronomia, de conferéncias, de passejadas e d’espectacles de carrièra, çò rapòrta Escambis en Òc. Demest los divèrses animals totemics de Lengadòc e d’endacòm mai, lo maridatge de la Baragonha de Sant Cristòu amb lo Tamaron de Vendargues (Montpelhierenc) foguèt un dels eveniments mai remarcables. A mai, de passacarrièras, de repaisses, lo concèrt dels provençals Lo Condor e los balètis amb Cornaleone e Coriandre animeron l’eveniment. La preséncia catalana foguèt remarcabla amb las piramidas umanas (castellers e falcons), los gigants catalans, los correfocs...
 
Lo Total Festum es organizat per la region qu’a pres lo nom d’Occitània e compta sus l’engatjament de 71 sòcis regionals entre d’associacions e de collectivitats. Creat en 2006, Total Festum es un eveniment portat per la region per tal de far viure e celebrar las lengas e culturas pròprias de son territòri, valent a dire occitanas e catalanas.