Bandièra01 1180x150: País Invisible

Actualitats

Cabilia: an pres un volontari per un piroman e l’an cremat viu

Jamal Ben Ismaïl èra un òme de 38 ans de la vila de Milana. Tres jorns abans que lo tuèsson, aviá viatjat mai de 200 km per ajudar a l’escantiment dels incendis

Tèxte legit

La molonada a cremat viu un volontari que collaborava a l’escantiment dels incendis, après l’aver pres per un piroman. La victima es Jamal Ben Ismaïl, un òme de 38 ans de la vila de Milana. Tres jorns abans que lo tuèsson, aviá fach un viatge de mai de 200 km fins al districte de Tizi Wezzu per ajudar.
 
Segon de mèdias locals, sortits d’una veitura sens placa de matricula, un grop de joves locals l’arrestèron e avertiguèron la polícia, en pensant que s’agissiá d’un piroman. Los agents arrestèron Ben Ismaïl, e lo menèron dins un forgon de polícia fins a Larebɛa n at Yiraten, un vilatge d’ont son originaris la majoritat dels 73 argerians mòrts a causa del fuòc. Tanlèu lo forgon arribat, la molonada dobriguèt la pòrta del forgon, sortiguèron Jamal Ben Ismaïl per fòrça, lo traïnèron sus qualques mètres e lo cremèron viu. Suls rets socials se pòt veire d’imatges esfraioses del crime.
 
La justícia argeriana a dobèrt una enquista e a avertit que los autors recebrián “un castig sevèr” per çò que considèran coma “un crime asirós”. De lor caire, Amnestia Internacionala e la Liga Argeriana de la Defensa dels Dreches Umans an qualificat lo crime de “barbar e atròç”, e assolidan que cal far justícia per mandar “lo messatge clar que la violéncia serà pas tolerada”.

 
 
 
 
abonar los amics de Jornalet
 
 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article