Lo dimars 10 d’agost, 21 gachas foguèron quilhadas sus Larzac. L’installacion foguèt menada per la landartista Véronique Brill. Un projècte concebut e creat amb Pierre Vuarain e Gilles Allaire per celebrar lo soslevament de las populacions fàcia a l’espandiment del camp militar e las transformacions realizadas sul causse dempuèi trente ans. Pels artistas, s’agís tanben d’una crida a la vigilància per nòstre temps.
 
Près de Sant Martin de Larzac, 70 personas de l’endrech o solament de passatge dins la region an participat a l’installacion de las 21 gachas.
 
S’agís de pèiras amontairadas, tiradas dels clapasses del causse, que forman de siloetas umanas. Los bastidors las an cargadas d’un messatge artistic e politic: de pèiras dins un tèrra de resisténcia, una tèrra que viu e se transforma e crèa de ligams amb d’autres territòris qu’an viscut la meteissa istòria.
 
Aquela istòria l’escriguèron de familhas païsanas, la populacion de Milhau e totes los participants al movement de Larzac que se soslevèron. Puèi, los novèls estatjants, los artisans, los païsans e los artistas prenguèron la relèva per far viure aquel territòri economicament, socialament e culturalament. En octòbre de 2021, una replica d’aquela relèva s’organizarà sus plaça.
 
De notar qu’an volgut que las gachas sián bastidas per de personas divèrsas e vengudas de mai d’un endrech, coma aquò se faguèt al moment de la construccion del cortial de la Blaquièra entre 1973 e 1975.