Bandièra01 1180x150: Comuna de Tolosa

Actualitats

crotz-tolosaCreated with Sketch.LengadòcLengadòc BasCorbièras

Uèi fa 700 ans que moriguèt Guilhèm de Belibasta

Considerat coma lo darrièr perfièch catar, l’occitanisme romantic li atribuís una profecia que se deviá complir uèi

Belibasta lo jutgèron a Carcassona e puèi lo cremèron viu dins la cort del castèl de Vilaroja de Termenés
Belibasta lo jutgèron a Carcassona e puèi lo cremèron viu dins la cort del castèl de Vilaroja de Termenés | Jose Manuel Mota

Tèxte legit

Lo 24 d’agost de 1321, fa 700 ans, executèron Guilhèm de Belibasta, considerat coma lo darrièr perfièch catar. Èra nascut 40 abans a Cubièra (Rasés) al sen d’una familha que sosteniá lo catarisme. Devèrs l’an 1305, durant una batèsta, Guilhèm de Belibasta tuèt Bertomieu Garnièr, un pastre de Vilaroja de Termenés (Corbièras). Per se redémer jonguèt lo catarisme. Lèu seriá ordenat perfièch a Rabastens (Galhaqués) ont faguèt la coneissença de Raimon de Castèlnòu, un dels mai emblematics dels darrièrs perfièches de l’epòca. Capturat amb sos companhs e mandat a la preson de Carcassona, capitèt a fugir en Catalonha. Après demorar un temps en Empordan s’establiguèt a Sant Mateu (País Valencian) dins una petita comunautat catara constituida mai que mai per d’exiliats occitans refugiats del vilatge de Montalhon (Savartés), un dels darrièrs fogals de resisténcia del catarisme que lor persecucion es ben detalhada pels escriches de l’evesque de Pàmias que vendriá lo papa Beneset XII.
 
 
Arnau Sicre
 
Belibasta foguèt traït per Arnau Sicre, gràcias al qual lo detendrián e condemnarián. La maire de Sicre èra estada arrestada e condemnada per la Santa Inquisicion que la faguèt cremar viva per aver professat la fe catara. Totas las proprietats de la familha foguèron confiscadas. Per tal de recuperar l’ostal de la familha, Sicre vendriá espion de l’Inquisicion que lo mandèt en çò dels catars en exili.
 
Sicre convenquèt qualques catars, dont Belibasta, de rintrar al Comtat de Fois per assistir a las nòças de sa sòrre. Sul camin, las fòrças de l’Inquisicion los esperavan a Tírvia, en Catalonha, abans de traversar los Pirenèus devèrs Vic de Sòs.
 
Belibasta lo jutgèron a Carcassona e puèi lo cremèron viu dins la cort del castèl de Vilaroja de Termenés, que n’èra originari lo pastre que l’aviá tuat lo catar.
 
 
Una profecia romantica
 
Segon la legenda, abans de morir sul lenhièr, Belibasta auriá dich: “Après sèt cents ans lo laurièr verdejarà”. Totun, aquela profecia mitica espandida dins l’occitanisme se tròba pas dins cap de document de l’epòca. Si que se tròba dins un sonet del felibre August Teulié entitolat Montsegur e publicat en 1905, que, pasmens, anóncia pas 700 ans mas 600.
 
 
Bogre: lo filme de la memòria
 
A prepaus de la persecucion del catarisme, s’es presentat ongan lo filme Bogre del realizaire occitan de las Valadas Fredo Valla e produch per la Chambra d’Òc. Lo filme es un documentari de mai de tres oras que rapòrta la persecucion dels catars e sas consequéncias umanitàrias. Dins aquel sens, revèla d’istòrias tombadas dins la desmembrança, l’anar e venir de personas, de culturas e d’idèas, e documenta d’un biais fòrça detalhat lo genocidi que lo patiguèt lo pòble occitan, jos l’escampa de perseguir una eretgia.



abonar los amics de Jornalet

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Franc Bardòu
8.

Cal far atencion : cap de tèxte non atèsta pas de la data del 24 d'agost. Non sabèm lo jorn ni lo lòc de l'assassinat de Belibasta. La gleisa catolica l'a benlèu tuat a Vilaroja de Termenés coma o afortissètz, o benlèu a Carcassona, e benlèu coma bon crestian (qualificat de catar pel integristas catolics), o benlèu coma criminal, e o èra estat, si-ben, mas plan mens qu'un inquisitor. Los dos testimònis que ne parlan son contradictòris. La sola causa segura es que la gleisa catolica tuava al nom del Crist. De qué noirir per pro longtemps qualques braves sirventeses contra Roma !

  • 1
  • 0
MOSCA CANHISCA
7.

#5 N'an pas nada opinion sus arren: Macron, l'ecologia, l'extrèma-dreta, tot que'us ei parièr. Totun, que n'i a causas a díser en comentari de l'editoriau d'aquesta setmana !

  • 5
  • 2
Berthe
6.

#4 De còps me demandi s'aquela coleta de "haters" imbecils de Jornalet aurián quicòm a far dins la vida sens Jornalet

  • 26
  • 2
Esquizofrenic Fan-Club
5.

#3 Se n'as pas res a fotre calha-te !

  • 33
  • 2
Albert Puech Rodés
4.

Belibaste, lo darrièr profèta d'una Occitània, Una , Granda, Apostolica e Catara.... Osca ! Nos deuriam cotisar per i quilhar una estatua, o una lausa. Mès segur que nòstre Jornalet nacional ne va far un sondatge : Oc / Non / N'ai pas res a fotre....

  • 2
  • 27

Escriu un comentari sus aqueste article