Bandièra01 capçalera  1180x150: Novestivada

Actualitats

Joan de l’Ors plora la despartida de Pèire Pous

A l’atge de 92 ans, lo contaire pirenenc del País de Saut Pèire Pous ven de morir dins la nuèit d’aqueste dijòus a divendres. Èra un dels darrièrs representants de la transmission orala dels contes

Pèire Pous ven de nos quitar dins la nuèit d’aqueste dijòus a divendres. Aviá 92 ans. Contaire pirenenc del País de Saut, èra un dels darrièrs representants de la transmission orala dels contes.
 
Nasquèt en 1929 sul planastèl de Saut, a Munés, prèp de Redoma. Grandiguèt pas; çò que fa que, dròlle, podiá pas anar ajudar la familha a trabalhar los camps. Alara, acompanhava los papets a gardar los tropèls e s’ocupava de las bèstias: “Tot m’apassionava: la natura, las plantas, las bèstias e sustot la tradicion d’aqueste pichon país. Agèri l’astre de viure mon enfança amb los dos pepins, lo pepin del Clat e lo pepin de Campanhan. Me contèron quantitat de contes ancians, remembres de trabalh e de vida vidanta.”, çò diguèt a La Dépêche.
 
Foguèt una vertadièra mina pels collectaires de memòria populara dels ans 1970: sos racontes son represes dins La tradition orale du conte occitan: les Pyrénées audoises (PUF, 1973-75), Cinq contes populaires du Pays de Sault (Atelier du Gué, 1979), e, en 2009, dins lo libre Contes et souvenirs (ACCES).
 
Los responsables d’aquesta associacion locala escriguèron: “Èra l’ivèrn. Cal aver de temps per la velhada. Tot lo mond escotava, la familha, qualques amics. Fasiam un vin caud sovent, quand fasiá freg. Lo contaire èra al mitan, las chiminièras èran nautas e èrem a l’entorn. Los enfants li disián: ‘Conta-nos Joan-l’Orset, lo Pescaire…’. Las sabiam de per còr, mas preniam autant de plaser lo vinten còp coma lo primièr, sabi pas perqué! Disiá pas jamai de non, èra totjorn prèst. ‘Un còp…’, çò veniá e èra partit.”
 
En 2011, li foguèt remesa la medalha de Chivalièr de las Arts e de las Letras, primièr còp que la distincion èra obtenguda per un tenent de la tradicion orala! Lo GARAE a fach dos DVD, Dins la nuèit de las paraulas, que veson lo Pèire Pous contar dos dotzenats d’istòrias: Jan l’Orset;Jan le Piòt;Lo lhop, el reinard e el peissonièr; El polh e el reinard; Lo lhop trompat; …
 
En 2016, los calandrons de Carcassona dediquèron lor espectacle de l’an als contes de Pèire Pous. Es amb una granda emocion que descobriguèt sus l’empont del Teatre de Carcassona dos centenats de pichons qu’interpretavan sas istòrias dins la lenga del país. D’unes l’èran anats véser e entrevistar dins son vilatjòt.
 
Lo poèta Bruno Peiràs, que lo rescontrèt en aquela escasença, escriu: “Aquel òme èra un personatge de sos contes e un tresaur de memòria e d’umanitat. Amb el es un tresaur de nòstra lenga, de nòstra literatura orala, de nòstra cultura que desapareis”.
 
 
 
 
Alan Roch
 
 
 
 

 
 
 
abonar los amics de Jornalet
 
 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

L’Alan Carcassona
5.

Obsèquis aqueste diluns 30 a 3 oras del vèspre, glèisa de Redoma.

  • 4
  • 0
Praube de nosaus
4.

https://www.youtube.com/watch?v=1XxQR2zaVcQ

https://www.youtube.com/watch?v=QRMmV9VrWjA

https://www.youtube.com/watch?v=bskP5fZKZ5E

https://www.youtube.com/watch?v=x00RnV-vssg

https://www.youtube.com/watch?v=AIoiDu9UmgU

https://www.youtube.com/watch?v=zENErKxf1Tc

https://www.youtube.com/watch?v=Kbwg9anHTWc

https://www.youtube.com/watch?v=4m9ushwEKvA

https://www.youtube.com/watch?v=5EOqxXdTDyg

https://www.youtube.com/watch?v=P_3PnWHC1O0

https://www.youtube.com/watch?v=JWFtm8Npl_8

https://www.youtube.com/watch?v=FKyZ-k8ViUg

https://www.youtube.com/watch?v=N-74L2HbgPk

https://www.youtube.com/watch?v=P-3zbbEigrU

https://www.youtube.com/watch?v=vupprse-aTQ

https://www.youtube.com/watch?v=ISKTL0r9dVs

https://www.youtube.com/watch?v=rtQafQ6IIgM

https://www.youtube.com/watch?v=Br5Zj7k3hec

https://www.youtube.com/watch?v=Jsh7KXrMsgk

https://www.youtube.com/watch?v=2KnF2J1CDOI

https://www.youtube.com/watch?v=FWtTKMS7-VQ

https://www.youtube.com/watch?v=iNXAa7ku8WQ

https://www.youtube.com/watch?v=HKMOeUzxOk4

https://www.youtube.com/watch?v=7tA3jdOYRO8

https://www.youtube.com/watch?v=R-h9CxDtQB0

https://www.youtube.com/watch?v=h3tcURaOBYw

https://www.youtube.com/watch?v=iU8MvQBadFg

èra un pichon escapolon....

E sen pòt recolegir mai enquèra


accent parisenc registrat en 1912

https://www.youtube.com/watch?v=amPtXEaXQO0

  • 3
  • 0
Gerard Cairon Florentin d Albigés
3.

Quin plaser d'escotar una tan polida lenga !
E cossí se fa sentir la necessitat d'un recampament de totes los collectatges , venents de totes los cantons, dins totes los parlars, d'aqueles qu'avián la lenga coma lenga mairala...
N'avèm besonh per lo plaser dels ausidors, mas tanben pedagogicament - se volèm pas que l'occitan venga una lenga calc del francés
Mas sovent, cossí trobar d'enregistraments que poirán servir a un moment precís quand son escampilhats un pauc pertot sus la tela
Nos cal un fons comun, aisit d'accés, amb de dintradas divèrsas :
- localisacion del parlar
-se son contes , entrevistas , cants etc...
-....
Se pòt pas saupre la suspresa del monde ausiguent un parlar "natural"quand aprenon qu'es un parlar aluendat de centenats de quilomètres de lor parlar local.
Emai se comprenon pas tot, i a dins la musica de la lenga dels locutors" naturals" un quicòm que fa realisar a los qu'escotan, l'unitat de la lenga dins sa diversitat...
E aqueles collectatges son de tresaurs per melhorar la lenga dels ensenhaires, del monde dels mediàs e de nosautres totes, de tant que nòstra fonología, nòstra sintaxi, etc... son parasitats per la lenga dominanta

  • 21
  • 0
Cris.
2.

Mercé a vosautres per aqueste omenatge. Tristesa.
Pensi que i a pas melhor de far, ara, pels contaires occitans, que de contunhar a contar sos contes.
Mercé a el per la transmission.
Es çò que contunharà de far, tre deman.
Trantalhavi entre dos contes. Es tot trobat serà : Sant Sulpici. Mas, me desencusi que la fin serà pas la meteissa...segurament que soi mai feminista que los aujòls...e botí l'amor a la fin, en plaça de la correccion de l'òme a la femna. Amor dels tres, amb lo nenon qu'arriba.
Èra mon contaire preferit ! Lo mai natural que conesca.
Cris.

  • 13
  • 0
P. Pojada
1.

Apreni per Jornalet la despartida d'aquel grand òme. Mercé a Jornalet per aqueste omenatge meritat. Mercé a Pèire Pous per aver servat duscas al darrèr alende la lenga nòstra e aver participat a la transmetre a travèrs los contes. Es tot còp un embelinament de se l'escotar contar, de s'escotar aquela votz tan caracteristica e aquel biais de dire. Nos'n brembarem de Joan l'Orset e dels sieus companhs. Mercé Pèire Pous.

  • 29
  • 0

Escriu un comentari sus aqueste article