Bandièra01 capçalera  1180x150: Novestivada

Actualitats

Revirada de la politica de Marròc après las eleccions legislativas

Lo Partit de la Justícia e del Desvolopament (PJD), que governava Marròc dempuèi 10 ans, a passat de 125 deputats a solament 12

Tèxte legit

Revirada màger de la politica marroquina après las eleccions legislativas. Lo Partit de la Justícia e del Desvolopament (PJD), que governava Marròc dempuèi 10 ans, es passat de 125 deputats a solament 12, dins una cambra de 395 deputats. Es demorat luènh de sos adversaris, lo Recampament Nacional d’Independents (RNI) —que fasiá partida de la coalicion de govèrn e qu’a obtengut 97 representants—, lo Partit de l’Autenticitat e de la Modernitat (PALM) —amb 82 deputats—e lo Partit de l’Independéncia (PI), qu’aura 78 deputats dins l’assemblada.
 
L’RNI es considerat coma un partit liberal-conservator e es dirigit per Aziz Akhannouch, un magnat vist coma pròche del rei del Marròc, Mohammed VI, e qu’èra fins ara lo ministre de l’agricultura. Lo grand vencut de las eleccions es l’actual cap de govèrn de Marròc e secretari general del PJD, Saadeddine Othmani, qu’a pas quitament pogut daverar lo sèti pel qual se presentava dins la circonscripcion Rabat-Ocean.
 
La desfacha del PJD, partit islamista non revolucionari, es quitament mai prigonda de çò qu’avián predich los sondatges mai pessimistas, e pòrta a la politica marroquina una revirada granda. Pendent la jornada electorala, lo PJD denoncièt “d’irregularitats grèvas” a causa de “la distribucion obscèna d’argent” près dels burèus de vòte, e a causa de la confusion” amb cèrtas listas electoralas, que, segon çò que dison, empachèt maites ciutadans de trobar los bulletins de vòte de lor partit. Segon lo ministre de l’Interior, l’independent Abdelouafi Laftit, lo vòte s’es tengut dins de circonstàncias normalas, delà qualques “incidents isolats”.
 
La participacion a aumentat per rapòrt a 2016 malgrat los dobtes sus la propagacion de la covid-19 e a atench lo 50,35% dels inscriches. Totun, cal prene en compte qu’ongan las eleccions legislativas an coincidit amb las eleccions localas e regionalas; se considèra qu’aquò a favorit la participacion. A mai, s’agís de las primièras eleccions ont lo nombre de deputats se calcula sul nombre d’elegeires inscriches, non pas de votaires, e se considèra qu’aquò a ajudat las formacions mai pichonas e geinat las mai importantas.



abonar los amics de Jornalet

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article