Bandièra01 1180x150: Comuna de Tolosa

Actualitats

La carn de caval de Findus, etiquetada coma carn de buòu, ven de Romania

| Kevin Friery

La carn de caval detectada en de plats preparats de la marca Findus, que s’indicava qu’èra de carn de buòu, ven de Romania. Es ailà que s’es provesit lo grop Spanghero, fornidor indirècte de Findus.


Spanghero, una cooperativa de Castèlnòu d’Arri (Lauragués), a reconegut trabalhar amb un masèl de Romania que sacrifica de bovins e de cavals, segon çò que raportèt France Info dissabte passat.
 
La cooperativa lauraguesa, l’an identificada coma l’origina de l’engana sul tipe de carn de tres produches de Findus que son preparats per Comigel, una entrepresa lorenca de carns amb sedença a Mètz. Es Comigel que lo gigant dels congelats visava d’en primièr, quand l’escandal se faguèt public dins lo Reialme Unit.
 
Los servicis antifraudariá de l’Estat francés an anonciat divendres passat que dobrissián una enquèsta. Lo ministre de l’Agricultura, Stéphane Le Foll, a considerat que l’“engana” sus las composicions dels plats de Findus “es pas acceptabla” e a assegurat que s’aplicarà “las sancions necessàrias”.
 
En seguida de çò qu’aviá fach al Reialme Unit qualques oras abans, Findus a indicat, divendres passat de ser, que suspend la venda dins l’Estat francés de tres dels sieus plats preparats a causa la preséncia de carn de caval en luòc la de carn bovina qu’es indicada sus las etiquetas. En consequéncia, retira los lòts qu’aviá distribuit dins las botigas.
 
La lasanha bolonhesa, lo chapladís parmentier e lo mossakà son de plats afectats per aquelas mesuras. Findus França las a justificadas —segon çò qu’a dich— per “un problèma de conformitat” amb lo tipe de carn d’un dels sieus fornidors: Comigel.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francés31270 Cunhaus
4.

1) Vendre de caval (o de pòrc en cò del angleses, ara) per de buòu es una engana. Aquò's problèma de marrit marcatge.
2) Soi mai escandalisat pel fatch que podi pas saver si lo que crompa i a d'OGM. Generalament es pas marcat. Soi tanben escandalisat per pas saber de faiçon mai clara çò qu'es amagat sus los diferents additius tal conservators, "melhorants" eca...

  • 1
  • 0
BOURDON Auloron
3.

E posca aqueth escandale incitar los consumidors a's virar de mei en mei taus circuits corts !

  • 1
  • 0
cissonet occitània
2.

A noste que parlam de "carambolha" tà definir aqueras practicas... Que sona occitan aqueth mot : l'es vertaderament ?

  • 0
  • 0
Ives
1.

Comença de venir un afar europèu d'ara enlà. La cooperativa Spanghero comercializa unas consèrvas "del terrador" (coma lo caçolet per exemple) ambe de carn que ven de l'Euròpa de l'Èst. Fin finala, i a benlèu pas que las mongetas que venon de Castèlnòu d'Arri (e encara ...). Son d'enganaspècs e pas res pus. Mas çò segur, aquò demòra un perilh per la nòstra santat (aquela carn de caval de Romania es d'una qualitat mai que marrida).

  • 3
  • 0

Escriu un comentari sus aqueste article