Bandièra01 capçalera  1180x150: Novestivada

Actualitats

La justícia de l’UE anulla l’acòrdi de pesca amb Marròc perque contraven als dreches del Sahara Occidental

Lo Front Polisario denoncièt que lo pache èra illegal perque esplecha las ressorsas dels sahrauís sens lor consentiment

Tèxte legit

La Cort Generala de l’Union Europèa (CGUE) a anullats los acòrdis de pesca e agricultura entre l’Union Europèa e Marròc perque compren de produches del Sahara Occidental, un territòri de descolonizar. La senténcia de la cort de Luxemborg a escotats los recorses portats pel Front Polisario contra l’UE per aver signat lo pache amb Rabat sens lo consentiment del pòble sahrauí. Concretament, planhon que s’espleche lors ressorsas de pesca, malgrat que los tribunals de l’UE avertiguèsson ja en 2018 qu’un acòrdi d’aquela sòrta se deviá far amb l’aprobacion dels sahrauís. L’ÒNU reconeis lo Sahara Occidental coma un territòri de descolonizar, mas en practica es ocupat per Marròc.
 
Totun, la justícia europèa manten l’aplicacion d’aqueles acòrdis “pendent un cèrt periòde de temps” per “preservar l’accion exteriora de l’Union e la seguretat juridica de lors engatjaments internacionals”. La decision se pòt recórrer davant la Cort de Justícia de l’UE, qu’es lo pus naut tribunal, dins un relambi de dos meses.
 
L’UE e Marròc signèron un acòrdi de pesca en 2006 que facilitava, entre tant, l’accès de naviris espanhòls a d’aigas marroquinas, mas tanben a las aigas sahrauís. En seguida dels planhs de l’ONG Western Sahara Campaign, en febrièr de 2018, la Cort de Justícia de l’UE estimèt qu’aquel pache se podiá pas aplicar al Sahara Occidental perque “enfranheriá de nòrmas determinadas del drech internacional” e “especialament lo principi de la liura determinacion”.
 
Brussèlas tornèt far l’acòrdi en ensajant de garentir l’accès a aquelas aigas. En octòbre de 2018, la Comission Europèa prepausèt un nòu pache en assegurant que consultariá plusors actors sul terrenh per poder complir l’exigéncia que la marcava Luxemborg: lo consentiment de la populacion. Pasmens, lo Front Polisario i participèt pas e denoncièt que Rabat aviá pas cap d’autoritat per negociar amb Brussèlas un acòrdi sus las aigas del Sahara Occidental.
 
 
 abonar los amics de Jornalet

 

 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article