Bandièra01 1180x150: País Invisible

Actualitats

L’assemblada generala de l’IEO Nacional decidirà se despareis o contunha

La desparicion de las ajudas publicas an menat l’IEO nacional a una situacion limit

| IEO

Tèxte legit

Dimenge que ven, 17 d’octòbre, se tendrà a Tolosa l’assemblada generala de l’Institut d’Estudis Occitans (IEO) Nacional. L’eveniment es d’una importància màger, compte tengut de la situacion de l’IEO, que sa desparicion o continuitat dependrà de las decisions presas durant aquela assemblada generala.
 
Dempuèi dijòus passat, l’IEO Nacional ten pas pus de director, qu’èra Laurenç Gosset. La rason n’es que se pòt pas pus pagar son salari a causa de la supression de las ajudas publicas de las regions nomenadas Occitània e Nòva Aquitània e de l’Ofici Public de la Lenga Occitana. Per tant, desenant l’anament de l’IEO Nacional repausa sonque sul benevolat. Per ara, lo burèu a pres en carga una part suplementària d’aquel trabalh mas cal de fòrças per manténer l’activitat essenciala d’edicion e de difusion, de secretariat, de representacion de l’IEO dins las instàncias nacionalas, estatalas e internacionalas de defensa de las lengas minorizadas.
 
Lo president, Pèire Brechet, a anonciat que se tornarà pas presentar, e fa una crida a actualizar las dinamicas e lo biais de foncionament, a la representacion de las seccions localas a l’IEO Nacional e sustot a una participacion nombrosa a l’assemblada generala.
 
 
Representant de l’occitanisme
 
Fondat en 1945 per Robèrt Lafont, Juli Cubainas, Pèire Lagarda, Leon Còrdas, Max Roqueta, Fèlix Castanh, Renat Nelli e d'autres, l’IEO trabalha per la promocion de la lenga e la cultura occitanas, la normalizacion de la lenga e son oficialitat. Es reconegut d’utilitat publica per l’administracion francesa dempuèi 1986.
 
S’a patit qualques crisis long de son istòria, l’IEO ten totjorn un ròtle essencial dins l’edicion e a la representacion de l’occitanisme e a l’aculhiment per defaut d'un grand nombre dels militants de la cultura occitana.
 
L’IEO s’organiza en seccions regionalas, departamentalas e cercles locals per tot lo territòri occitan e endacòm mai. Es organizat en divèrses sectors: l'edicion (IDÈCO), l'animacion, la musica e las seccions plasticas. A l'ora d'ara, l'IEO a trenta seccions departamentalas, quatre seccions regionalas e l'IEO Nacional, la federacion nacionala.
 
Per mai d’informacion: ieo-oc.org.
 

abonar los amics de Jornalet

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Degarta
16.

#10 Me fasètz pas dire çò qu'ai pas dit. Ai dit que l'IEO e La Setmana èran pas las solas a far de causas importantas per la lenga. Ai pas jamai dit que lor disparicion èra pas grand causa, ni que las caliá sacrificar.
Explicavi sonque a #7 que la tragedia de lor disparicion èra pas una rason per insultar las estructuras que demòran, e escopir sul trabalh que fan.

  • 0
  • 0
francesc palma
15.

Aquesta terra es nòstra terra
Des de Niça fins a Bordèu
Des de Lemòtges fins Alacant
Ela es nòstra de veritat

Tant se fa bon coma se fa tempesta
tant se fa fred coma se lo solei crema
Tant se fa vent coma s' està calmat
Ela es nòstra de veritat.

Aquesta terra es nòstra terra
Des de Niça fins a Bordèu
Des de Lemòtges fins Alacant
ela es nòstra de veritat.

Es lo nòstre cel
Es la nòstra mar
E aquels turons
E aquesta val
Las oliveras e los camps de blat
Ela es nòstra de veritat

Aquesta terra es nòstra terra
Des de Niça fins a Bordèu
Des de Lemòtges fins Alacant
Ela es nòstra de veritat.

Woody Guthrie

  • 0
  • 0
Franc Bardòu
14.

#12 Per res ni de ges de biais França non vòl pas REALAMENT sosténer d'autras lengas e culturas que la sieuna.

  • 6
  • 0
G
13.

#11 contunham lo rasonament, perqué França sostendria l'occitan?

Anam luènh aital

  • 5
  • 1
glück
12.

Question bestiassa. L'OPLO es l'emanacion de doas regions occitanas de quatre. Perqué sostendria un IEO Nacional ?

  • 5
  • 3

Escriu un comentari sus aqueste article