Bandièra01 1180x150: Comuna de Tolosa

Actualitats

Nòu pas del president polinesian dins la siá estrategia independentista a l'ONU

Oscar Temaru demanda lo sosten dels ciutadans per reïnscriure Polinesia sus la lista de l'ONU de territòris non descolonizats

| Jason Brown

Aquel cambiament d'estatut poiriá dobrir la pòrta a un referendum d'autodeterminacion. Lo cap polinesian fixa los uèlhs sul precedent de la Nòva Caledònia.




Lo president de la Polinesia Francesa, Oscar Temaru, a aprofechat la campanha presidenciala en França per far un nòu pas dins la siá estrategia independentista. Segon un correspondent d'AFP, Temaru faguèt virar la setmana passada una letra entre la populacion polinesiana per demandar lo “sosten” a la “lucha politica” per l'autodeterminacion. Dins la letra, Temaru apondiá qu'a la fin d'ongan anarà a la sedença de l'ONU a Nòva York per ensajar d'obténer que la Polinesia Francesa torne èsser inscricha sus la lista de territòris non autonòms de descolonizar. 

 
Consent amb la Resolucion 1514 de l'Assemblada Generala de las Nacions Unidas, los territòris que son pas encara descolonizats an lo drech “a l'autodeterminacion”. Aquò poiriá dobrir la pòrta a un referendum per aténher l'independéncia o una autonomia fòrça avançada. Ça que la, França decidiguèt de retirar la Polinesia Francesa de la lista de l'ONU en 1947, per çò qu'oficialament lo territòri oceanic fa 65 ans qu'es pas mai una colònia.

 
Aquò es çò que Temanu vòl cambiar. Arunan, lo cap independentista obtenguèt que l'assemblada autonòma de Polinesia votèsse en favor d'una resolucion que demandava al president de la Republica Francesa la reïnscripcion del país sus la lista.

 


Lo precedent de la Nòva Caledònia 

 

Un autre territòri oceanic contrarotlat per l'Estat francés, la Nòva Caledònia, foguèt trach de la lista de l'ONU tanben en 1947. Mas la pression dels independentistas canacs obtenguèt que l'ONU acceptèsse de reïnscriure lo territòri sus la lista en 1986. Entre 2014 e 2018, la Nòva Caledònia deu celebrar un referendum sus l'independéncia del país.
 


Aqueste article ven del jornal catalan Nationalia.cat, amb qui Jornalet a un acòrdi de cooperacion.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Faidit Comuns
1.

Serà apassionanta l'annada 2014 per Kanaky.
Mas cranhissi que l'estat francés, encara un còp, faga tot çò que pòt per contunhar de senhorejar.

  • 5
  • 0

Escriu un comentari sus aqueste article