Fa qualques setmanas, lo grop Tri Yann joguèt son darrièr concèrt al cap de 50 ans de viradas. En Occitània, lo grop Du Bartàs arrèsta, el, de virar al cap de quinze annadas plan emplenadas. Sos membres van partir cap a d’autras aventuras artisticas e musicalas.
 
 
Du Bartàs, una brava istòria
 
Du Bartàs es una istòria que remosa uèit musicians, cinc engenhaires del son, de milierats de rescontres, de centenats de passatges sus d’emponts en Occitània e endacòm mai, de collectatges,… Un temps marcat per la sortida de sièis CD que cadun ten sa tematica: Fraternitat, Turbò Balèti, Es contra ta pèl, Tant que Vira, Cinc (qu’èra lo… cinquen). Lo mai recent, lo seisen doncas, se ditz Rufa e recampa de tèxtes tradicionals occitans e de composicions sus de tèxtes de Laurenç Cavalièr (l’arma del grop), de Joan Bodon e Leon Còrdas.
 
La formacion a seguit una dralha long de son aventura: la transmission del cant popular occitan.
 
 
Una serada de tria
 
Lo grop marcarà la fin de sas prestacions per un darrièr concert festiu programat lo dissabte 6 de novembre al domeni de Russòl, a Lauran de Menerbés a comptar de 6 oras del ser .
 
En mai del concèrt e del sopar, seràn presentas las 3 fanfaras espelidas mercé al concors de Du Bartàs: la Fanfara de Menerbés, la Fanfara de l’Avenir e la Fanfara dels Artpalhós.
 
Per capitar la serada a l’entorn d’una taulejada a se’n lepar los dets, dels vins de qualitat de Menerbés e del ric repertòri de du Bartàs, lo grop benefícia de las ajudas de las associacions 11Bouge e Abribús-Montlaur-val de Danha coma de la cooperativa artistica Sirventés.
 
Atencion : vos cal pas decidir al darrièr moment per prene part a la serada ; es necessari e indispensable de reservar la participacion al sopar e la dintrada a la serada en mandant un messatge a dubartasfinfinala(a)gmail.com
 
 
 
 
Alan Roch