Lo president catalan en exili, Carles Puigdemont, demanda al govèrn de la Generalitat de Catalonha que sa situacion personala siá pas a l’òrdre del jorn de cap de negociacion amb l’estat espanhòl. Dins un article publicat dijòus dins El Punt Avui, Puigdemont reclama que “degun faga pas lo pòrtavotz de l’exili ni interferisca pas en prepausant de corchas non sollicitadas”.
 
Puigdemont demanda que se respècte son estrategia e insistís per que se cèrque de solucions collectivas pels represalhats. “Ni cercam cap de gràcia anticipada ni cresèm qu'aquela opcion pòrte cap de solucion al conflicte, e evidentament tanpauc per las mai de tres mila personas afectadas per la repression”, çò ditz.
 
A mai, soslinha que la sola solucion del conflicte politic entre Catalonha e l’estat espanhòl es l’amnestia e l’exercici del drech a l’autodeterminacion. “Tornar coma personas liuras, coma o èrem quand entamenèrem lo camin de l’exili, es una idèa que m’acompanha cada jorn quand me lèvi e quand me’n vau dormir”, çò conclutz.
 
Entitolat “Anèrem pas a en exili per demandar gràcia”, l’article se publiquèt lo jorn que que se complissián los 2 ans de la senténcia que condemnava los lidèrs independentistas catalans a de penas d’entre 9 e 13 ans de preson.
 
De son caire, la ministra de la politica territoriala espanhòla, Isabel Rodríguez, declara que lo govèrn de son país a pas res entreprés per facilitar lo retorn de Puigdemont en Catalonha.

 

Demano que la meva situació personal no formi part de cap agenda de l’anomenada taula de diàleg acordada per ERC i el govern espanyol ni de cap conversa bilateral https://t.co/qtz32TN979

— Carles Puigdemont (@KRLS) October 14, 2021