Bandièra01 1180x150: País Invisible

Actualitats

Nigèria: almens 50 mòrts dins l’atac d’un supermercat

Aperaquí 200 atacants se placèron a l’entorn de l’establiment comercial e tirèron

| Lo blòg de Linda Ikeji

Tèxte legit

Nigèria: almens 50 mòrts dins l’atac d’un supermercat
 
Aperaquí 200 agressors se placèron a l’entorn de l’establiment comercial e tirèron
 
 
La fusilhada d’un supermercat a Nigèria a daissat un tragic bilanç d’almens 50 personas mòrtas e 17 nafradas grèvas. Se tenguèt dimenge passat a Goronyo, dins l’estat de Sokoto, e foguèt un vertadièr infèrn. Aperaquí 200 assalhidors se placèron a l’entorn de l’establiment comercial e tirèron. Puèi cremèron 7 veituras e faguèron de pilhatges. Lo blòg de Linda Ikeji ne publica d’imatges esglasiants.
 
L’atemptat fa pensar a un eventual espandiment del grop terrorista Boko Haram e de l’autoproclamat Estat Islamic en Africa occidentala.
 
Lo president de Nigèria, Muhammadu Buhari, a assegurat que se sarrava la fin dels “bandits” pr’amor que l’armada e las fòrça de seguretat nigerianas an aquerit “d’esquipas avançadas”.
 
Cossí que siá, Nigèria patís dempuèi longtemps una violéncia terrorista insuportabla que sembla pas de demesir. Doas setmanas abans lo masèl de Goronyo, de desenas de ciutadans foguèron massacrats a Sabon Birni dins un atemptat semblable al de dimenge passat.



 
fffff fffff
 30 000 assassinats dins los darrièrs 10 ans
 
Boko Haram foguèt fondat en 2002. Dins los darrièrs dètz ans aquel grop armat a assassinat 30 000 personas. Ten qualques milièrs de milicians que semenan la terror dins l’estat federal de Nigèria e tanben en Cameron, Nigèr e Chad. Combaton l’administracion nigeriana, tant l’armada coma las escòlas e las universitats amb la tòca d’impausar una dictadura integrista religiosa basada sus l’islam pus radical.

Boko Haram vòl dire en lenga hausa “l’educacion occidentala es un pecat”. Per illustrar aquel nom, en 2014 sequestrèt dins d’òrras condicions 237 liceanas de Chibok, çò qu’esmoguèt la comunautat internacionala. Boko Haram anoncièt un acòrdi de liberacion per dire, fin finala, que las joventas èran estadas maridadas e convertidas a l’islam. Una liceana qu’aviá capitat a fugir contèt que sas camaradas èran violadas e que devián acceptar de se far musulmanas se volián pas èsser escoteladas.

Nigèria es lo país mai poblat d’Africa (a l’entorn de 170 milions d’estatjants). Produtz de petròli que solament ne benefícia un quart de la populacion. Lo país patís de problèmas de corrupcion e de fugida dels capitals qu’aumentan las tensions etnicoreligiosas.

Dins lo nòrd de Nigèria, de majoritat musulmana —los crestians son majoritaris dins lo sud—, la sècta Boko Haram, qu'assagèt una insurreccion dins los estats del nòrd en 2009, s’illustra tristament per de mesfaches sovent qualificats de crimes contra l’umanitat: destruccion de glèisas o de vilatges, atemptats contra d’estacions de tren o d’ostalariás, chaples de populacions, en particular crestianas, minoritàrias dins l’airal.
 
   
 

 
 




abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article