La jurista e professora de l’Universitat de Tolosa 1, Wanda Mastor, remetèt divendres passat a l’executiu de Corsega son rapòrt sus “l’evolucion institucionala de Corsega”. Lo document se prepausa coma una “boita d’espleches” per arribar a una autonomia e quitament a una modificacion del foncionament de las institucions de l’illa, çò rapòrta Alta Frequenza. Lo govèrn de Gilles Simeoni va analisar aquel trabalh per li donar una dimension politica. A mai, lo rapòrt s’invitarà forçadament dins la futura campanha presidenciala francesa.
 
Dins son rapòrt, Mastor mençona tres possiblas opcions devèrs l’autonomia. Una d’aquelas opcions es “a minima” e s’agiriá d’apondre un nòu article, lo 72.5, a la Constitucion francesa, que permetriá a Corsega “d’adaptar qualques leis a las especificitats localas”, mas dins aquela ipotèsi Corsega auriá pas una autonomia legislativa. Una segonda opcion que permetriá ben una autonomia legislativa seriá la d’ajustar un article 74-2 a la lei fondamentala francesa qu’especifiquèsse que Corsèga poguèsse “aprovar sas pròprias leis sens passar per París”. La tresena opcion es la mai maximalista e prepausa la redaccion d’un nòu títol dins la Constitucion francesa inspirat del títol XIII pertocant la Nòva Caledonia.
 
Mastor a dich que son estudi, encargat pel govèrn còrs, demòstra qu’existís pas “cap de fren juridic” per l’autonomia de Corsega, mas si “un fren cultural, lo jacobinisme”, coma o rapòrta Nationalia.
 
Lo rapòrt tanben prepausa de camins per la reconeissença constitucionala del pòble còrs e per l’aplicacion de l’ensenhament immersiu de la lenga, malgrat la senténcia de la Cort Constitucionala contra l’immersion a prepaus de la Lei Molac.
 
Segon Simeoni, Corsega deu aver una autonomia de plen drech, dins “un ponch d’equilibri entre las fòrças que son nacionalistas [còrsas] e las qu’o son pas”.
 
 
 

Remise par Wanda Mastor du rapport que je lui ai commandé sur 2 thèmes :
- Renforcement démocratique de nos institutions,
- Statut d’autonomie de plein droit et de plein exercice.

260 pages et 15 propositions pour ouvrir le débat au sein des institutions et de la société corse ! pic.twitter.com/jnUVciCLwz

— Gilles Simeoni (@Gilles_Simeoni) October 15, 2021