Eth passador sanitari, tanben dit certificat Covid, ei a compdar d’aué obligatòri ena Val d’Aran entà entrar en bars, restaurants, centres culturaus e esportius e residéncies d’ancians. Ja ère obligatòri ena rèsta d’Occitània pr’amor qu’atau ac auien establit es govèrns francés e italian. Ara, era justícia a validat era decision deth govèrn dera Generalitat de Catalonha. Atau, er executiu catalan vò evitar mesures mès restrictiues coma limitacions d’oraris o d’aforament. Es menors de 12 ans son excludidi, pr’amor que non an cap arrecebut eth vaccin.
 
Eth document que certifique qu’òm ei vaccinat, o ben qu’a passat era malautia o ben qu’a un tèst PCR negatiu. Lo cau mostrar abans d’entrar enes establiments, damb era carta d’identitat. Era polícia n'assegurarà eth compliment.
 
Es establiments auràn de designar personau entà contrarotlar er accès, sense sauvar es donades des persones. Aquerò non a entosiasmat bric as professionaus concernidi. Totun, se diden “resignadi” a acceptar-lo entà non auer de barrar mès que mès en temps de Nadau.
 
Mentretant, contunhen en vigor es autes mesures coma portar era masca en espacis interiors, e era proïbicion de minjar e béuer en carrèr entre 1h e 6h dera net.