Bandièra01 1180x150: Comuna de Tolosa

Actualitats

EconomiaPoliticaSocietat
crotz-tolosaCreated with Sketch.GuianaRoergueBacin de la Sala

Vivièrs: la justícia declara lo barrament de la fondariá de la SAM

Los emplegats an decidit de blocar las rotas que menan a l’usina amb de pèças de metal destinadas a Renault

| @BCavalerie

Tèxte legit

Après la decision de Renault d’acceptar pas un repreneire, de milièrs de personas se recampèron dijòus passat davant la fondariá de la SAM (Societat Avaironesa de Metallurgia), en Roergue, per manténer la pression mas de badas: lo tribunal de comèrci de Tolosa anoncièt sa senténcia divendres e la fabrica deu barrar definitivament, çò rapòrta France 3.
 
Dijòus passat, 25 de novembre, èran environ 3000 a se mobilizar, a l’espèra d’una audiéncia determinanta al tribunal de comèrci de Tolosa. Es lo recampament mai grand qu’aja vist lo bacin carbonièr de la Sala en plena setmana. Mai d’un èran presents per partejar colèra e indignacion amb los obrièrs de la SAM, basada a Vivièrs (Bacin de la Sala). Lo refús de Renault, l’unic client, de sosténer l’ofèrta de represa prepausada per Patrick Bellity, ancian dirigent de la fondariá fins a 2016, condemnava d’un biais certan l’entrepresa. Lo secretari general de la CGT (Confederacion Generala del Trabalh, principal sindicat de la metallurgia), Philippe Martinez, s’i èra quitament gandit per mostrar son sosten als obrièrs mai que jamai determinats a o far tot per salvagardar lor emplec. “Es absoludament escandalós çò que se passa”, çò denónciava Philippe Martinez, en blaimant la decision de Renault e l’inaccion de l’estat francés, primièr accionari del gigant automobila. Mas res poguèt pas cambiar la senténcia de la multinacionala: ni lo sosten de la region qu’a pres lo nom d’Occitània (900 000 èuros de subvencions e un prèst de 2,4 millions d’èuros sus 6 ans), pas mai que l’ajuda d’un million d’èuros e lo prèst de 4,7 millions d’èuros de l’estat francés acordats en sosten al projècte de represa de Patrick Bellity.
 
 
La liquidacion de las activitats de la SAM declarada pel tribunal de comèrci de Tolosa
 
Sus las parets de l’usina s’es placardat los retraches de totes los obrièrs e lor ancianetat, coma un acte de resisténcia, mas lo divendres 26 de novembre, lo darrièr espèr foguèt tuat e es un vertadièr desastre social que s’anóncia pels 340 emplegats de la SAM. D’efièch, lo tribunal de comèrci de Tolosa a declarat la cessacion immediata d’activitat puslèu que de programar una novèla data d’audiéncia, çò qu’auriá permés de perlongar l’activitat de la fabrica lo temps de trobar benlèu un autre repreneire.
 
En reaccion, los emplegats an decidit de blocar las rotas que menan a l’usina amb de pèças de metal destinadas a Renault. Lo cònsol de la Sala, François Marty, se ditz atupit per la marrida novèla: “Aquò es una vergonha, e una catastròfa”. La presidenta de la region a tanben lèu reagit dins un comunicat en denonciant una “decision brutala”, e en garentissent que daissarà pas las causas demorar aital.
 
De notar qu’una granda protèsta s’alestís pel dimècres 1r de decembre, en fin de matinada, davant la SAM.  D'autobuses vendràn de tota Occitània e endacòm mai.

 
 
 
 
 
 
 


abonar los amics de Jornalet

 





 
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Escriu un comentari sus aqueste article