Bandièra01 1180x150: Comuna de Tolosa

Actualitats

InternacionalPolitica

Guadalope: lo govèrn francés lèst per parlar de l’autonomia

Lecornu a precisat qu’un modèl possible seriá lo de Polinesia

Lecornu a evocada la possibilitat d’un dialòg per l’autonomia après aver parlat amb d’elegits de Guadalope la setmana passada
Lecornu a evocada la possibilitat d’un dialòg per l’autonomia après aver parlat amb d’elegits de Guadalope la setmana passada | @SebLecornu

Tèxte legit

Lo ministre francés d’Otramar, Sebastien Lecornu, a afirmat que lo govèrn de Castex èra “lèst” per debatre d’una possibla autonomia de Guadalope, archipèla de Cariba qu’a viscut, aquestas darrièras setmanas,  de protèstas e susmautas per carrièras, çò rapòrta Nationalia.
 
Lecornu a evocada la possibilitat d’un dialòg per l’autonomia après aver parlat amb d’elegits de Guadalope la setmana passada. “Segon eles, Guadalope se poiriá gerir melhor ela meteissa”, çò a dich lo ministre. A mai, a precisat qu’un modèl possible seriá lo de Polinesia. Guadalope es a l’ora d’ara una region e un departament d’otramar francés. Coma tal, dispausa pas d’un estatut especific.
 
Las protèstas viscudas aquestes jorns dins l’archipèla las aluquèron las mesuras decretadas pel govèrn francés per conténer la pandemia de la covid-19, mas tanben seguisson una granda desafeccion envèrs la metropòli que l’aviá quitament senhalada Patrick Karam, vicepresident del conselh regional de l’Illa de França nascut en Guadalope. “Lo passador sanitari es la beluga” mas en realitat “i a un malèsser social, un malèsser identitari en çò que tanh a la Republica Francesa, un sentiment creissent de pèrda de nivèl de vida e d’abandon”, çò diguèt.
 
Mai d’un elegit de Guadalope, dont lo president del Conselh Regional, Ary Chalus, an reprochat aquestes meses a París que las decisions sanitàrias prenián pas brica en compte las caracteristicas e las condicions de l’archipèla caribenc. En 2019, los elegits de Guadalope avián reclamat que França permetèsse l’adaptacion de las leis estatalas d’un biais diferenciat al territòri de Cariba.
 
 
Corsega revendica lo meteis vejaire
 
Femu a Corsica, lo partit del president còrs, Gilles Simeoni, a publicat un comunicat que planh que lo govèrn francés aja pas lo meteis vejaire sus Corsega. E ramenta que la “granda majoritat dels còrses” an sostengut mai d’un còp los partits politics que reclaman un estatut d’autonomia, mentre que, per contra, lo govèrn francés refusa sistematicament de ne parlar.
 
A las eleccions de 2021, los partits nacionalistas còrses obtenguèron 2 vòtes sus 3. En octòbre, lo govèrn còrs presentèt un estudi que suggerissiá tres vias constitucionalas devèrs l’autonomia.

 
 
 

abonar los amics de Jornalet

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Biçolat
3.

Se lo govèrnament balha l'autonomia, cal pas que la balhe, mas se la balha pas cal que la balhe.

  • 3
  • 2
Pitaluga
2.

Es lo govèrn que brandís l’espaurugalh de l’independéncia en cultivant, coma sempre, la mescla malonèsta entre autonomia e independéncia. Sembla que los de Guadalope demandan quicòm de mai concrèt. E çò concrèt al govèrnament, li agrada pas. E coma de costuma de paga de mots, qu’aquò còsta pas car. Seriá lo Bernard Arnaud l’interlocutor, li contariá pas de cracas. Sofistas, vai !
Quim

  • 3
  • 0
t.
1.

Los que manifestan , an demandat "autonomia" ?
Es un biais preu govern de "negar lo peish" ! De desvirar la colèra deu monde sus un subject aute .

Un país on tan de monde son praubes e n'an pas de trabalh ,
on n'i a gaire de desvolopament economic , sonque la seguida deu comèrci coloniau
on tantes joens s'en van, forçats de deishar lo país per se ganhar la vita ,
on adara tantes vielhs son solets
on los politicians ne son quitament pas capables de gerir las responsabitats que ja son lors : lo hilat d'aiga , los transports , lo telefone et internet, las escòlas , etc etc ... (longtemps a que la màger part de las gents ne van pas mei votar per aqueras monacas !)
on aqueths se ploran tostemps que n'i a pas nat sòus per arren...

Autonomia ? ? ? per mei de misèria ?
E que costaré mens car per França ? que s'estima que li costa car , trop car ?

  • 5
  • 2

Escriu un comentari sus aqueste article