Bandièra01 capçalera  1180x150: Botiga

Actualitats

Bearn: los abitants defendon lor riu contra l’installacion d’una peirièra

| Defendons la plaine / Reporterre

Tèxte legit

En Bearn, un projècte de peirièra menaça lo gave d’Auloron. Los ribairòls e las associacions ecologistas manifestèron dissabte passat 27 de novembre contra una esplecha que risca d’engolir tota la plana.


200 manifestants èran presents per dire de non al projècte de peirièra d’extraccion de gravas a Carressa e Cassabè, portat pel grop Daniel, una entrepresa especializada dins los materials de construccion, çò rapòrta Reporterre. Las palas mecanicas an ja començat de cavar mentre que de recorses davant lo tribunal administratiu son pas encara acabats d’estudiar. Los estatjants crenhon mai que mai de consequéncias grèvas, dins lo domeni ecologic, per las tèrras agricòlas, e fin finala que provòque lo borrolament de tota la vida vidanta dels estatjants del parçan.
 
Un collectiu d’associacions, Defenem l’Arribèra (“Défendons la Plaine”), s’es amassat per s’opausar a aquel projècte. Demest las associacions contràrias a l’installacion de la gravièra, se tròba Amassa per Doman, que ne fa partida Domenja Lekuona. Aquesta rancura que la peirièra se faga dins un mitan natural fragil, una plana alluviala, mentre que doas enquistas publicas menadas abans lo projècte s’i son opausadas. Aquò foguèt pas pres en compte e sola una enquista privada que balhava l’aprobacion foguèt retenguda. Cal apondre qu’al ras del gave d’Auloron, la zòna es classificada Natura 2 000 e que los cavaments metràn saique en perilh d’ecosistèmas ja pro fragils.
 
Delà la gravièra, los manifestants denóncian tanben un projècte regional de granda amplor destinat a servir los talhièrs de l’LGV (Linha de tren de granda velocitat) Bordèu – Tolosa e de la còsta del Bascoat que contribuís a l’artificializacion creissenta dels sòls amb de risques d’aigats destruseires mai importants. En mai d’aquò, segon los membres de Defenem l’Arribèra, i a pas de rason per que lo grop s’arrèste al perimètre d’autorizacion. Pertot ont son implantats, e especialament long del gave de Pau, an pas quitat d’espandir lors activitats que fan desaparéisser las tèrras agricòlas e menaçan l’anar natural dels rius.
 
 
Cavar al ras dels rius, una operacion dangierosa
 
Cavar a proximitat dels rius entraïna un risc d’avulsion, es a dire qu’en cas de fòrta pluèja, lo lièch del riu poiriá èsser completament desplaçat, amb de consequéncias incommesurablas per las populacions e los ecosistèmas. Michel Rodes, de la SEPANSO 64, associacion de defensa de l’environament tanben presenta a la manifestacion, avertís: “En Alemanha, al moment dels aigats de julhet de 2021, la vila d’Erftstast- Blessem, prèp de Colonha, patiguèt de degalhs irreversibles a causa d’una gravièra dins la quala s’èra encafornat lo riu.”
 
 
 
 
abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Domenja Salias
3.

Adishatz
Mercés de'n parlar.
Lo nom de l'intercollectiu qu'ei Défendons la plaine ~ Güeitam l'arribèra (e òc iniciaument qu'ei un miei umide jà transformat en... çò que disen plana en francés).
Lo site per sabé'n mei qu'ei. https://defendonslaplaine.org mailto:adiu@defendons la plaine.org.
Lo redactor que parla d'enquistas. Que i avó ua ensuista publica qui lo raportaire e remetó conclusions negativas. Las autas que son enquistas tecnicas (3) pagadas e miadas peus servicis de l'Estat, totas tres negativas. Lo Sénher prefècte que retien e s'apèa sus la sola enquista "maison" ISL produsida per Daniel-DPL qui era est favorabla...
Enfin la vila pròcha de Köln, per part engolida per l'arriu Erft (e l'apòrt de la gravèra) que's ditz per consequent Erftstadt.
Atau e mercés enqüèra.

  • 2
  • 0
Matilda Salias
2.

Mercés

  • 0
  • 0
Pitaluga
1.

Los abitants defendon l'umanitat contra lo degalh bastisseire, qu'agota las ressorgas e emplena l'espaci d'orrors de veire e de beton.

  • 7
  • 0

Escriu un comentari sus aqueste article