Bandièra01 1180x150: La Passem

Actualitats

InternacionalPolitica

Virada polemica de Macron pels païses del golf Persic

Es lo primièr president a rompre l’isolament diplomatic infligit al prince Bin Salman après l’assassinat del jornalista Jamal Khashuqji

| EFE/SPA

Tèxte legit

La virada que l’a efectuada lo president de França pels païses del golf Persic a fach polemica. Macron es estat lo primièr president occidental a rompre l’isolament diplomatic infligit al prince eiretièr saudian, Muhammad Bin Salman, òme fòrt del reialme que lo considèra l’ÒNU responsable de l’assassinat del jornalista Jamal Khashuqji (sovent transcrich Khashoggi).
 
Macron a justificat son rescontre amb Bin Salman en disent que cèrca de nòus acòrdis comercials e que França pòt pas quitar de parlar amb la principala poténcia de la region se vòl contunhar de desvolopar son ròtle estrategic e umanitari. “Qui pòt pensar una sola segonda qu’ajudam Liban, que preservam la patz e l’estabilitat dins l’Orient Mejan se disèm: «Parlam pas pus a l’Arabia Saudita, lo país mai important del Golf»?”, çò s’es demandat.
 
Macron e Bin Salman an parlat amb lo primièr ministre libanés per ensajar de trobar una solucion a la crisi diplomatica entre Riad e Beirot. Riad expulsèt l’ambaissador de Liban après qu’un membre del govèrn libanés aguèt criticat la guèrra que l’Arabia Saudita dirigís en Iemèn. L’ÒNU demanda que se meta lo ponch final a aquela guèrra, qu’a causat, dempuèi 2015, la mòrt de 10 000 enfants, segon l’UNICÈF. De soslinhar que de bancas dels Estats Units, del Reialme Unit, de França, Canadà e d’Espanha finançan e aprofièchan aquel desastre umanitari.
 
 
17 miliards d’èuros en armas pels Emirats Arabis
 
Entre tantas causas, Macron a signat un acòrdi de venda d’armas als Emirats Arabis per una valor de 17 miliards d’èuros. L’acòrdi compren la crompa d’80 avions de combat Rafale, 12 elicoptèrs e d’autras armas, e es lo contracte mai important de l’istòria de França.
 
Per daissar un bon imatge, mai que mai en periòde preelectoral, Macron a tanben presentat a Qatar la dobertura d’un corredor umanitari per evacuar mai de 400 afgans menaçats pels talibans.
 



 


abonar los amics de Jornalet
 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
1.

Ara s'amagarà darrèr la realpolitik aquel maufatan de mercant d'armas per far passar lo talhon.
A pas vergonha de reabilitar lo que faguèr esbocinar un opausant politic, e a l'estrangièr en mai d'aquò.
E pensar que l'esfèra mediatico-politica nos voldrà vendre lo tipe coma un defendeire de la democracia pendent tota una campanha electorala. (Campanha que de fach a pas arrestat dempuèi 2017.)

  • 7
  • 0

Escriu un comentari sus aqueste article