Lo govèrn de la Nòva Zelanda a anonciat que voliá enebir l’accès al tabac a la generacion venenta, de sòrta que los neozelandeses qu’ara an catòrze ans o mens aurián pas jamai l’escasença de ne poder crompar legalament. La ministra de la santat, Ayesha Verrall, a explicat que la nòva legislacion fariá créisser cada annada l’edat legala per fumar amb l’intencion de crear una “generacion sens tabac”.
 
“Volèm assegurar que los joves comencen pas de fumar perque volèm que venga un delicte lo fach de vendre o de fornir de produches de tabac als nòus grops de joves. Las personas de catòrze ans, quand la lei intrarà en vigor, poiràn pas jamai crompar de tabac d’un biais legal”, çò a declarat la ministra.
 
Ça que la, la modificacion de l’edat legala es pas la sola mesura que la considère lo govèrn de Jacinda Ardern. D’efièch, se prevei tanben de far pojar lo prètz dels paquets de tabac per los far venir inabordables. L’intencion de l’executiu es que la Nòva Zelanda siá un país sens tabac en 2025.
 
D’autras mesuras consideradas per la legislacion son: demenir la quantitat legala de nicotina dins los produches amb tabac; reduire lo nombre de botigas que pòdon vendre de cigarretas; aumentar lo finançament dels servicis que luchan contra las dependéncias. La lei afectarà pas la venda de cigarretas electronicas.
 
Lo percentatge de neozelandeses fumaires a davalat aquestes darrièrs decennis. En 2018, l’11,6% dels ciutadans fumavan abitualament, un nombre significativament inferior qu’un decenni abans (18%). Ça que la, los percentatges creisson entre las minoritats coma los maòris (29%).