Bandièra01 1180x150: Comuna de Tolosa

Actualitats

Irlanda del Nòrd: an commemorat lo 50n anniversari del Dimenge Sagnós

De milièrs de personas se son recordadas del masèl del 30 de genièr de 1972

| Clodagh Kilcoyne/Reuters

Tèxte legit

Se commemorèt dimenge passat lo 50n anniversari del Domhnach na Fola (o Bloody Sunday) en Irlanda del Nòrd. Una marcha de milièrs de personas ramentèt aquel masèl de l’armada britanica que marquèt lo conflicte entre las doas nacions.


Lo Dimenge Sagnós
 
Lo Domhnach na Fola o Bloody Sunday (Dimenge Sagnós) es lo tèrme emplegat per far referéncia al masèl qu’aguèt luòc dins lo quartièr de Taobh an Bhogaigh (Bogside) de la vila de Doire, lo 30 de genièr de 1972.
 
Aquel jorn, 15 000 personas manifestavan contra una lei que permetiá al govèrn britanic d’empresonar de mond suspèctes d’aperténer a l’IRA, sens cap de jutjament prèvi. La manifestacion, convocada per l’Associacion pels Dreches Civils de l’Irlanda del Nòrd, s’organizava pacificament fins qu’un grop isolat de personas comencèsson de lançar de pèiras contra una barricada de soldats. Aqueles respondèron primièr amb de gas, amb de balas de goma e amb d’aiga de pression, e posteriorament amb de fuòc real, çò que tresmudèt las carrièras de Doire en caos.
 
Amb lo Domhnach na Fola de 1972, segon las donadas oficialas, se parla de 13 mòrts demest los quals i aviá 6 menors, e mai de 26 ferits per bala demest los quals 5 foguèron visats per l’esquina. Al total, i aguèt mai de 30 nafrats, que qualques unes foguèron desquilhats per de veïculs de l’armada.
 
De fonts independentas, mai que mai de jornalistas, certifiquèron que cap dels ferits èra pas armat.
 
Lo primièr batalhon dels paracasudistas, responsable del masèl del Domhnach na Fola, foguèt interrogat pel govèrn britanic mas, fin finala, las responsabilitats foguèron pas esclarzidas. En 1988, lo primièr ministre Tony Blair demandèt una autra enquista e lo 15 de junh de 2010, après dotze ans de recèrcas, se faguèt venir public lo rapòrt oficial, de 5000 paginas, qu’acusava formalament l’armada britanica d’aquel chaple.
 
Lo grop irlandés U2 escriguèt una cançon suls faches, sonada Sunday, Bloody Sunday, un grand succès de vendas internacionalas, qu’a servit per far conéisser la situacion de l’Irlanda del Nòrd a la comunautat internacionala.
 
 
  

 



 abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Franc Bardòu
2.

#1 Efectivament, entre 1936 e 1939, los fascistas espanholistas faguèron çò meteis dins cada ciutat e cada vilatge castelhan, basc e catalan republicans. La quantitat i foguèt plan mai considerabla, mas la tecnica (terrorisme d'estat) i foguèt la meteissa.

  • 5
  • 2
francesc palma
1.

Los paracaigudistas anglses feren una matança e fins e tot a un capelhan. Colha de fachistas. E non los an fait res als criminals. La justicia demora muda.

  • 3
  • 0

Escriu un comentari sus aqueste article