Anonciadas dempuèi d’annadas, las primièras eolianas flotantas en Mediterranèa deurián començar de produire d’energia devèrs la fin de 2023. D’efièch, tres maquinas de 10 megawatts seràn implantadas al larg a 16 km de las còstas de Narbonés e de Rosselhon, a drech de Leucata, çò rapòrta France 3.

Lo projècte de construccion de tres eolianas flotantas en Mediterranèa foguèt decidit dijòus passat per Ocean Winds e la Banca dels Territòris, amb per objectiu que foguèsson foncionalas a la fin de l’annada 2023.

“La decision finala d’investiment permetrà de signar los contractes amb los principals sòcis industrials e financièrs e de lançar la fasa de construccion del projècte”, çò precisan dins un comunicat Las Eolianas Flotantas del Golf del Lion (LEFGL), la societat comanditària del programa.

Es Ocean Winds que pilòta lo projècte, una companhiá dedicada a l’eolian en mar detenguda per Engie e lo grop portugués EDPR, dont lo sèti es a Madrid.

D’eolianas flotantas gigantassas

Aquelas eolianas de darrièra generacion son fixadas sus un mast de 100 mètres de naut amb 3 palas de 75 mètres de long. Lo tot es pausat sus 3 flotadors de 25 mètres de naut que formaràn un triangle de 70 mètres de costat.

En captant los vents regulars e sostenguts del larg, las eolianas del projècte EFGL, las mai poderosas jamai installadas sus un flotador, cobriràn elas solas los besonhs annadièrs en electricitat de mai de 50 000 abitants del litoral, çò es l’equivalent de la vila de Narbona.

La mesa en servici del pargue eolian es prevista a fin de 2023, per una durada d’esplecha de 20 ans.

Aquelas tres eolianas, que l’assemblatge final ne serà realizat dins lo pòrt de la Novèla, dins Aude, seràn installadas en Mediterranèa, “a mai de 16 quilomètres” al larg de Leucata e del Barcarés dins los Pirenèus Orientals.

Estudiat dempuèi 2017, aquel projècte a ja obtenguda l’autorizacion de las autoritats administrativas.